Композиторлан бюст лийшаш!

Фотом onf.ru сайт гыч налме.

Россий калык фронтын Марий Элысе активистше-влак республикысе тӱвыра, печать да калык-влакын пашашт шотышто министерствыш да Медведево районысо администрацийыш йодмаш дене миеныт. Марий композитор Кузьма Смирновлан шочмо Шихмамат ялысе паркыште бюстым вераҥдаш шонат.

Тидын нерген тений июньышто тунемше Софья Архипова В.Путин деке вияш эфирышкат серен. Тыгак ӱдыр «Установка бюста К.А.Смирнову» проектым возен да «Фёдоровские чтения» регионысо научно-практический конференцийыште икымше верым налын. Но окса полышым муын огыл.
Вес ийын композиторын шочмыжлан 105 ий темеш.

Калык фронтын активистше-влак да тысе кучем ял калык дене вашлийыныт. Шихмамат ял калык ден верысе администраций кӱлеш документым ямдылымеке, проектлан оксам ойырымо шотышто йодышым рашемдат.