22-27 мартыште рӱдолаште «Театральный Йошкар-Ола» фестиваль лийын, 11 у спектакльым аклаш лукмо.
Тушко Э.Сапаев лӱмеш опер да балет Марий кугыжаныш академический театр, М.Шкетан лӱмеш Марий драмтеатр, Курчак, Марий самырык да Курыкмарий театр-влак ушненыт. Кажне спектакльлан акым Моско гыч театровед, театральный критик-влак Ольга Галахова, Валентина Федорова, балетный критик, «PRO Танец» журналын обозревательже Александр Максов, Йошкар-Ола гыч театровед Нина Ефимова пуэныт.
Орол ден студентке…
Фестиваль 22 мартыште Марий самырык театрын сценыштыже «Сторож» лирический комедий дене почылто. Тудым Карелий гыч режиссёр, драматург Сергей Пронин (Сеппо Кантерво) шынден. Спектакльын сюжетше оҥай. Действий Санкт-Петербургышто У ий деч ончыч эрта. Студентке институтысо актёр мастерскойышто вич йӱдым эртарымыж годым самырык охранник дене палыме лиеш. Орол тудым эн ончыч зданий гыч луктын колташ тӧча, но варажым ӱдырым йӧратен шында. Тыште кок самырык еҥ кокласе чон шижмашым, икте-весе кокласе кылым почын пуымо. Тыге йӧратымаш да ӱшан темым ончыктымо. Спектакль кызытсе самырык-влаклан келшен толшо. Автор нунын кутырымо лексикыштым кучылтын.
Шым тӱрлӧ йылме дене
23 мартыште М.Шкетан лӱмеш Марий драмтеатрыште С.Пектеевын шындыме «FOLKS» спектакльыже ончыкталте. Сюжет почеш марий рвезе, студент-антрополог тӱнямбал йылме лагерьышке логалеш да моло калык-влакын тӱвырашт дене палыме лиеш. Самырык ӱдыр-рвезе-влак тылзым ончат, мече дене модыт, шке илышышт нерген каласкалат. Ты спектакльыште чыланат эртыше пагытым шарналтат. Келшымаш да йӧратымаш темым нӧлталме. Актёр-влак шым тӱрлӧ йылме дене мутланат. Кажныже шке тӱвыражым, муро поянлыкшым, калык ойпогыжым каласкала.
Критик-влак ты спектакльлан сай акым пуэныт. Спектакльын авторжо да режиссёржо Степан Пектеевын мастарлыкшым, профессионал улмыжым палемденыт. Шочмо элым йӧратыме, патриотизм теме уло маныныт. Чылажымат шот дене ыштыме. Артист-влак сайын мурат, лывыргын куштат, йот йылмыла дене куштылгын мутланат.
Тыгодым спектакльын формыжо изиш ӧрыктарен. Вет тудо тыглай драматический спектакль дене йӧршеш келшен огеш тол. Концерт спектакль семын ойлен кодымо. Сӱретче Екатерина Андрееван пашажым сайын аклыме.
Умбакыже 1 апрельыште лекше номерыште лудса.