Волгатехын 10 студентше Российысе профильный олимпиадыште сеҥышыш да призёрыш лектын.
Российысе чодыра вуз-влак коклаште лесопользований дене VIII олимпиаде эртен. Тений тушто элнан 19 вузшо гыч 1072 студент шкем терген. Волгатехысе чодыра да природопользований институтын 47 студентше олимпиадыш ушнен, тушеч 10 еҥ сеҥышыш лектын.
– Олимпиадын тӱҥ миссийже – чодыра дене кылдалтше профессийым кӱлешаным ышташ, ончыкылык самырык специалист-влакын уш-акылыштым вияҥдаш, чодыра паша дене кылдалтше эрудицийыштым кумдаҥдаш, – манын олимпиадысе оргкомитетын председательже А.Иванов.