Марий национальный конгресс Марий Эл Республикынан чапланыше эше ик лӱмлӧ еҥжылан шарнымаш оҥам ямдылен. Тудо марий сем тӱняште кугу надырым пыштыше ӱдырымаш, кӱслем чапландарыше да ты семӱзгар дене шоктышо-влакын мастарлыкыштым профессиональный кӱкшытыш нӧлталаш полшышо Анна Сидушкиналан пӧлеклалтын.
Анна Романовнан шочмыжлан тений январьыште 105 ий теме. Шке жапыштыже тудо республикыштына кӱслем шоктышо-влаклан школым почаш уло вийжым пуэн. Тудо марий ӱдырамаш кокла гыч кӱшыл музыкальный шинчымашым эн ончыч налын, тыгак Марий АССР искусствын сулло деятельже лӱмым сулышо ӱдырамаш кокла гыч тудо икымше лийын. Сайын мурен, туныктышылан, хормейстерлан ыштен. Калык тудым музыковед, фольклорист, композитор семын шарна.
А.Сидушкина 1915 ийыште Курыкмарий районышто шочын. Москвасе П.И.Чайковский лӱмеш кугыжаныш консерваторийыште шинчымашым налын. Кугу Отечественный сар жапыште Маргосфилармонийын артистше семын чапланыше фронтовой концерт бригадыште выступатлен. Республикыштына тудо «Пеледыш» кӱсле ансамбльым чумырен, «Марий памаш» фольклор ансамбльыште шке мастарлыкшым ончыктен. Тудын вуйлатыме кӱсле ансамбльже Москваште Кремлевский концертный полатыште выступатлен. Анна Романовнан кӱслем шоктен муралтымыжым шке жапыштыже чапланыше «Мелодия» Всесоюзный грампластине фирме возен.
А.Сидушкина лӱмлӧ композитор К.Смирновын пелашыже лийын. Нуно икте-весылан ӱшанле ӱмыр пелаш гына огыл лийыныт, усталык пашаштат пырля пашам ыштеныт: марий калык мурым нотыш пыштымаште тыршеныт. 1951 ийыште «Марийские народные песни» нотный сборник лектын.
Анна Романовнан ӱмыржӧ шке шочмо кечынже 1981 ийыште кӱрылтын. 1954 ий гыч пытартыш кечыже марте тудо Йошкар-Олаште Советский уремысе 151-ше номеран пӧртыштӧ илен. Йошкар-Ола администраций дене кутырен келшыме деч вара шарныктыш оҥам лач тиде пӧрт пырдыжыш сакаш палемдыме.
Мемориал оҥам почмо торжественный мероприятий 25 августышто 9 шагатлан эрта.