«Мемнан Сеҥымаш кечына» (Наш День Победы) акцийыш Пенза область ушнен. Россий президентын Юл кундем федеральный округысо полномочный представительжын темлыме акций нерген Интернетыште материал-влак #песнипобедыПФО #нашденьпобеды хештег дене шыҥдаралтыт.
Пенза областьыште «Сеҥымаш кече» мурым Россий искусствын сулло деятельже Владимир Каширскийын вуйлатымыж почеш Губернаторский симфонический капеллын солистше-влак йоҥгалтарат.
— Видеосюжетым возымо годым мыланна Кугу Отечественный сарын ветеранже-влак шкеат, «Волонтеры Победы» ушемын чолгаеҥже ден поисковик-влак, промышленный предприятийын пашаеҥже да моло калык возаш полшеныт. Чылаштланат «Сеҥымаш кече» муро – произведений гына огыл, а колымаш ваштареш совет калыкын пеҥгыдын да лÿддымын шогымыжым ончыктышо гимн, — каласен Владимир Каширский.
Видеороликым элыштына мӧҥгыштӧ шинчыме режимым увертарыме марте возымо.
Сар жапыште Пенза область гыч армийыш 300 тÿжем наре еҥ каен, сар пасу гыч 190 утла тÿжем еҥ пöртылын огыл. Шалатыме Рейхстагыште 1945 ий майыште «А мы из Пензы!» манын возымо курымешлан шарналт кодын.
Сеҥымашым кондаш фронтышто гына огыл, тылыштат тыршеныт. Пенза кундемыште шуко промышленный предприятий пашам ыштен. Миным, авиабомбым, артиллерий снарядым тысе заводлаште чарныде луктыныт, военный самолетлан тÿрлö детальым, шинельлык сукнам, ечым тышеч колтеныт.
2020 ийыште Пенза ола «Город трудовой доблести» Российысе почетан лÿмым налаш шона.
Ушештарена: 8 май марте Юл кундем федеральный округысо чыла регионышто «Сеҥымаш кече» муро йоҥгалтеш. А 9 майыште марафон иктешлалтеш. «Мемнан Сеҥымашна» («Наш День Победы») акцийыш але марте Мордовий, Марий Эл, Удмуртий, Башкортостан, Самара область да Татарстан, Нижегородский область, Пермь край, Саратов ушненыт. Ульяновск деч вара муро марафон Пенза областьыш кусаралтын.
Сайт ден социальный сетьлаште проект нерген #нашденьпобеды, #песнипобедыПФО хештег гоч пален налаш лиеш.
#песнипобедыПФО, #нашденьпобеды, #амыизпензы, #деньпобедыпенза #75летпобеды #75летпобедыпенза #годпамятииславы