Светлана Петрова лу ий психологлан пашам ышта. Тушеч кок ийже – Волжский район Сотнур школышто.
– Светлана Михайловна, кузе психолог профессийым ойырен налында?
– Кугу Корамас школышто латикымше классыште тунеммем годым ончыкылык профессийым ойырен налаш неле лийын. Филологлан тунемаш каяш шоненам, но мемнан школышто филолог-влак улыт. Адак кушко пашаш кайыме шотышто йодыш лекте. Вара журналистлан тунем лекташ шонымаш лийын, но шке виемлан ӱшанен омыл. Тунам ачам психологлан каяш темлен. «Москошто психолог кӱлеш», – манын. Кӧ тыгай психолог пален омыл, но Крупская лӱмеш Марий педагогический институтыш тунемаш пуренам.
– Студент пагыт кузе эртен?
– Икымше курсышто поснак неле лийын. Шукын руш улыт, шкем кӱшкӧ шынденыт, сандене ял гыч улмемлан вожылынам. Икана погынымаште ойленыт: «С вашими детьми будут учиться 1% дети колхозников». Тунам чонлан эше йӧсӧ лийын. Йӧра ача-ава толын огытыл, шоненам. Туге гынат нимолан ом ӧкынӧ. Тидым чыташ кӱлын улмаш.
Икымше курс деч вара «йолымбак шогалынам». Кокымшо курсышто ялысе-шамыч оласе-влак дечат сайынрак тунемаш тӱҥалынна. Моло факультетыште тунемше-влак тӱрлӧ кружокыш, ансамбльыш коштыныт гын, мемнан жап лийын огыл, эре тунемынна. Но дискотекыш южгунам миен толынна. А йӱдым т ӱ шкагудыш огыт пурто, сандене тӱшкан, куд шагат эрым вучен, мурен-куштен шогенна.
– Тунем пытарымек, кушто пашам ыштенда?
– 2009 ий 1 сентярь гыч шке шочмо Корамас школыш пел ставкылан пашаш лектынам. Тыгак шкенан районысо Приволжский посёлкышто психологий полышым пуышо ик рӱдерыште пел ставкылан ыштенам.
Школышто туныктышем-влак порын вашлийыныт. Мыланем тушто пашам ышташ келшен. Кызытат арнялан ик гана миен толам.
Тулеч вара ик жап йочасадыште ыштенам, но чон школыш шупшын. Тунам мыйым Сотнур школыш ӱжыныт. Ынде тыште кокымшо ий тыршем. Чылаже лу ий стажем погыныш. Тыште класс вуйлатыше улам, шукыжым начар тазалыкан (ОВЗ) йоча-влак дене пашам ыштем.
– Тиде паша шуко вийым налеш…
– Паша куштылго огыл, но ыштена, чытена. Мыйын ик шонымаш гына: нине йоча-влак лудын, возен, шотлен моштышт. Нуно кӱшыл математикым палаш огыт тӱҥал гынат, сай айдеме лийышт.
Начар тазалыкан 11 тунемше уло. Кажнылан посна программым ямдылыман. Вара отчётым эре возыман. Йочан иктаж-могай шӱкалтыш уло але укем тергат. Шукыжым – кагаз паша. Но занятийым эртарымат шуко вийым «кочкеш». 15 минут тунемына, 30 минут модына. Кечеш 2-4 занятийым эртарена. Тыглай тунемше-влакат полышым йодыт, но молгунамсе семын шинчаваш огыл, а WatsApp приложений дене йодышым колтат. Айдемым палыде, вашмутым возен колтем.
– Еш илышыште психолог улмыда полша?
– Полша. Икшывем — влакым , ӱдырем ден эргымым, сайын умылем. Нунылан йӧсӧ гын, шижам, полшаш тыршем. Йочам колышт моштыман, тудын дене мутланыман.
– Конкурслаште вийдам тергеда?
– 2015 ийыште «Идалыкын психологшо» районысо конкурсышто икымше верыш лектынам. 2016 ийыште «Идалыкын психологшо» республик кӱкшытан конкурсышто заочно вием тергенам, но сеҥыше-влак радамыш логалын омыл.
Йоча-влак дене конкурслашке эре ушнена. 2019 ий кеҥежым Сотнурысо «Молодёжная инициатива» проектыш логальым. «Живи, Родник» проектым Йошкар-Олашке аралаш миенна. Черке воктенысе памашым тӧрленна. Ынде тушто мотор, чатка лийын.
– Психолог паша неле огыл манын ойлышо-влак улыт. Тидын нерген мом каласеда?
– Психологын пашаже огеш кой. Тидым мыланна тунемме годымак ойленыт. А сокращений лиеш гын, психолог ден логопед-влакым эн ондак паша гыч кораҥдат. Мемнан дене начар тазалыкан йоча-влак уке улыт маныт, а вара ончет да лектыт. Ме, психолог-влак, ОВЗ черан йоча-влак дене нимогай результатым ончыктен огына керт. ЕГЭ-м огына сдатле, олимпиадыш огына кошт, конкурс шагал эртаралтеш. Лектеш: ме пашам йӧршын огына ыште.
Приволжскийыште психологический рӱдерыште «ойыртемалтше» икшыве-влаклан кеч конкурсым ыштат. Тушко йоча-влакын пашаштым колтена, чӱчкыдын сеҥыше радамыш лектына. Паша неле гынат, чыташ логалеш, вет тиде – чонлан келшыше паша.
Йӧратыме пашаш гына ала-мыняр меҥге тораш кошташ лиеш. Ны йӱр, ны поран огыт чактаре. Тек кажне айдеме чонлан келшыше, йӧратыме пашам ышта. А Светлана Михайловналан ме чытышым да у кӱкшытым, сеҥымашым тыланена.