Тиде кечым кугурак судебный пристав Надежда Николаевна Богдановат палемда. Тудо Суд пристав-влакын федеральный службын Йошкар-Оласе управленийыштыже 2-шо №-ан пӧлкам визымше ий пӧлкам вуйлата.
Н.Богданова Калмыкий Республикыште шочын-кушкын. Марлан лекмеке, 2001 ийыште ешыж дене Марий Элыш илаш куснен.
– Йошкар-Олашке толмеке, ондак «Контакт» заводышто пашам ыштенам. Тунамак строительный техникумышто «Право и организация социального обеспечения» направлений дене тунемынам. Вара Медведево районысо судышто судебный заседанийын секретарьжылан ыштенам. Тыгодымак МОСУ-што юридический факультетыште тунемынам. Секретарьлан кум ий утла пашам ыштымеке умыленам: мый самырык, чолга коллективыште лийнем. 2006 ий сентябрь годсек УФССП-ыште пашам ыштем. Эн ондак судебный пристав-исполнитель лийынам. Могай сомылым шукташ логалеш, мый паленам, сандене ӧрын омыл, пашам уло кумылын шуктенам.
Йошкар-Оласе УФССП-ыште 2-шо №-ан пӧлка физический лица-влак деч алиментым, налогым, административный штрафым «кӱрын луктеш». Кодшо ий дене таҥастарымаште тений парыман еҥ-влак деч 3 млн шукырак окса бюджетыш пурен.
– Надежда Николаевна, тыгай пашам ышташ тӱҥалам манын шоненда мо?
– Ондак тыгак профессий улмо нерген паленат омыл. Моло ӱдыр-влак семынак кидпашам йӧратенам: тӱрленам, пидынам, ургенам. Ончыкыжымат тиде пашам ыштем манын шоненам. Но пӱрымашем весе улмаш. Тудо жапыште нимогай образованием лийын огыл, пелашем дене Марий Элышке толынна. Тунам тудо пограничный войскан офицерже ыле.
– Молан лач тыгай куштылго огыл профессийым ойырен налында?
– Тиде, очыни, мыйын койышем дене кылдалтын – холерик улам. Эре ала-мом уым кычалам, вашкем, икманаш, илыш «шолмым» йӧратем. Пелашемат Медведево районысо пӧлкан суд пристав-влакын начальникышт лийын. Мый ужынам: могай тушто коллектив, кузе нуно пашам ыштат, сандене чонем тышке шупшын. Умылтарен мошташ неле, но тиде мыйын верем, йӧратыме пашам.
– Пашаште могай нелылыкым шижыда?
– Тӱҥ шотышто – еҥ-влак дене вашумылыдымаш. Паша тыгай: должник-влак деч оксам налшаш улына. Южгунам мыланна сырат, вурседылыт, но титаканже нуно шке улыт: могай-гынат налогым але штрафым жапыштыже огыт тӱлӧ. Пытартыш жапыште парыман еҥ-влак чӱчкыдын вуйым шийыт, тугеже ме сайын пашам ыштена.
– Те кидпашам ышташ йӧратенда манын ойлышда. Кызыт тидлан жап уло мо?
– Шагал, шуко жапым службо налеш. Парыман еҥ-влак деке кастенат кошташ логалеш, каныш кечынат пашаш лектына. Южгунам эр кандаш шагат гыч тӱҥалын, лу шагат кас марте пашам ыштена. Туге гынат кидпашалан жапым мый эре муам. Тасма дене сӱретым ыштем, ургем, фоамиран дене тӱрлӧ пеледыш-влакым ыштылам.