Кугу Отечественный сарыш 32 млн наре еҥ каен, Марий Эл гыч – 142 тӱжем утла еҥ.
75 тӱжем землякна вуйым пыштен да пленыш логалын. 53 салтаклан Совет Ушем Герой лӱмым пуымо.
Марий кундемыште икымше кечыла гычак эвакуаций тӱҥалын. 1942 ий декабрьлан республикыш 29208 еҥ толын. Нуно шукынжо Моско, Ленинград, Калинин да Мурманск областьла, Украинский ден Белорусский ССР гыч лийыныт.
Москосо, Ленинградысе, Одессысе эвакуироватлыме профильный заводла гыч Йошкар-Олаште оптико-механический предприятийым, 297-ше номеран заводым, ыштыме. Сар жапыште тудо 85 тӱрлӧ оптический прибор-влакым ыштен луктын да фронтышко колтен. Москосо прожекторный заводым эвакуироватлыме, 298-ше номеран заводым ыштыме. Тудат ятыр кӱлешан агрегатым ямдылен.