Салам лийже, «Кугарня» газет редакций. Икмыняр ий ончыч лийше случай нерген палдарынем.
Икана омым ужынам. Пуйто кудывечым ӱштмем годым пакча могырым колышо изам толеш. Тудо 50 ийым эрталтыше колен гынат, омыштем самырык кончен, иктаж 30 ияш, тугаяк кужу капан, кудыррак ӱпан. Ӱмбалныже – ару спецовко, тыгайым пошкудо карьерыште пашам ыштыше-шамыч чият. Изирак товарым кучен. Товарже ший тӱсан, кечыште чолгыжеш, вургыжат у.
Изам ваштарешем шыргыж толеш. Мый товаржым ончем да шке семынем шонем: «Могай чапле товар, тыгайже мыланемат кӱлеш». А изам тидым пуйто умылыш да ойла: «Уке, тиде мыйын товарем, тиде ӱзгар шкаланем кӱлеш. Тыйын шке товарет уло». Тыге мане да, капкам почын, уремыш лектын кайыш. Мыйын товаремын кӱртньыжӧ шемемше, вургыжат тошто манын шонен шоген кодым.
Тылеч вара икмыняр тылзе эртен. Омо нерген монденам ыле. Но ик ойган случай тудым уэш шарныктыш – омышто кончышо изамын эргыже самырыкак колыш. Калыкыште ойлат, пуйто омышто кончышо товар эрге икшывым ончыкта. Тыгак лие: изам шке товаржым шкеж пелен наҥгайыш. А мыйын эргым тудо жаплан черланен ыле. Теве молан товарем омышто шемемше кончен.
Инна.
Параньга район.
Интернет гыч налме фото.