Лиеш вет илышыште тӱрлыжат. Жап эртымеке шоналтет, да шкежат ӧрат, тыгай случай лийын мо тый денет?
Кок ий ончыч, шошым, Олюкын ала-мо шот дене кумылжо пеш волен кайыш, кид-йол вийжат иземмыла чучо. Шкенжым воштончышыш ончале да ӧрмыж дене шинчам карыш: шӱргыжӧ кагаз гай ошемын, а кидше какарген. Йолжым кучен ончыш гын, йӱштӧ. Кочмыжат ок шу, пучымышым шканже огыл, а йочажлан шолтен пукшыш. Раш: тудлан колаш жап шуын.
Шымле кандаш ияш ӱдырамаш ойгырымо олмеш вес тӱняш каяш ямдылалташ тарваныш: «Чылт колен колтем гын, мыйым моргыш наҥгаят. Теве кунам мыланем вожылаш перна, вет ӱмбалнемже – чыла тошто вургем. Медпашаеҥ-шамыч шке коклаштышт «Ончыза, могай нужнан илен тиде ӱдырамаш, чияшыжат шотан вургемже лийын огыл» манын ойлат дыр. Уке, тыге огыл, чыла шот дене лийже».
Олюк шондык гыч вургемжым лукто, йӧршеш у йымал тувыр-йолашым, у халатым чийыш. Ӱпшым сайын шере, кудыртыш, ӱмбакыже духим шыжыктыш. Ындыже колаш возеш гынат, нигӧ деч ок вожыл.
Тиде жапыште капка ончылно трактор йӱк шоктыш. Тракторист Осып Виталий дене шукертак пакчам куралыкташ кутырен ыле. Тидыже пеш жапыштыже огыл да, нимом от ыште. Олюк, капкам почын, Виталийым пакчашке ужатыш. Пакча пеш писын куралалте. Тракторист уремыш кудал лекте, тунам веле озаватым ужшыла койо: «Могай пайремыш каяш тарваненат, Ольга акай, толмем дене мый планетым лугыч ыштышым ала мо?» «Чын, но мый ынде нигуш ом вашке, тый шке жапыштыже толын шуынат. Тау, тыгай кугу пашам ыштен кодыметлан. Умбакыжат мыланем полшаш кумылет лийже», – вашештыш илалше еҥ.
Тений пареҥгым ом шынде манын шоныш гынат, эргыже, шешкыже, уныкаже-шамыч шынден пуышт. Марпа лӱман пошкудо ӱдырамаш Олюк ӱмбак шыргыж ончале да йодо: «Мо пеш моторын чиенат, Олюк? Иктаж пайремак огыл дыр тыйын, моло кечын тыгайым ужмаш уке ыльыс?» «Мый кажне кечын тыгаяк улам, ӱмбакемже ончалмашет уке дыр?» – мане тудо.
Олюкын кумылжо вашталте, ынде колымо нерген шонымым мондыш. Чылажымат тракторист керте, колаш тарваныше ӱдырамашым ылыжтыш.
Вес тӱняш каяш ямдылалтмыжым Олюк ынде мыскарашке савырыш, лишыл родо-шамычлан веле огыл, молыланат каласкала.
Микывыр Лаймыр.