Самырык-влак кокла гыч ялозанлык профессийым ойырен налше-шамыч лектыт гын, моткоч куанем. Поснак вольык воктене шогылтшым ужмек, мланде сомыл ден ял илыш огыт йом, шонем.
Морко поселко гыч Мария Каменская Озаҥ оласе кугыжаныш ветеринарный медицине академийыште нылымше курсышто тунемеш. «Изинек суртвольыкым, поснак пырыс ден пийым, чот йӧратенам. Пырысиге-влакым туныктенам, нуно мутым колыштшо лийыныт. Мӧҥгыштӧ таче кок пырысна уло, кудывечыште – пий», — манеш ӱдыр.
Маша Морко посёлкысо 6-шо номеран школышто, вара Кокласола лицейыште тунемын. Лицейыште биохимий направлений дене кыдалаш шинчымашым налмек, Озаҥ оласе Бауман лӱмеш КГАВМ-ыш ветеринарный медицине факультетыш тунемаш пурен.
«Кокласола лицейыште биохимий направлений дене тунемын, шукынжо тӱрлӧ оласе медицине институтлаш тунемаш пуреныт. А мылам ветеринарий келша. Айдеме ден вольыкын анатомийышт коклаште икгайлык уло, но могай гына янлык уке, кажныжын строенийже мо дене гынат ойыртемалтеш, чыла палыман. Чер нерген туныктат, вольыкланат тыгак УЗИ-м, рентгеным да моло тергымашым эртарена. Кызыт Калуга областьыште практикыште улам. Икымше кечылаште 2500 вуй вольыклан вакцинацийым ыштенна. А 4800 презе кокла гыч иктыжым – йӧратемак»,- ойла ончыкылык ветеринарный врач.
Озаҥысе вузыш Мария Каменская 2015 ийыште бюджет верыш тунемаш пурен. Сайын тунемеш, стипендийым налеш. «Камелот» ялозанлык студотрядышке ушнен, Краснодар кундемышке фруктым погаш кок гана миен. Тений кеҥежым уэш стройотряд дене пайдале пашам шукташ кая.
«Кызытсе самырык тукым серьёзныйрак лияш тӱҥалын, шонем. Тунемаш вес олалашке каят, келшыше профессийым налыт. Мый дечем палымем-влак вузыш тунемаш пурымо, могай экзаменым кучымо шотышто йодыштыт. Вашке сессий лишемеш, чыла экзаменым сайын кучен, угыч стройотрядыш ушнаш ямде улам», — паладрыш Мария.
Ончылно эше ик ий тунемман. Ӱдыр кушто пашам ышташ тӱҥалме нерген шонкала. Питерыш, Москош, Калугыш да моло кугу олалашке корно почылтын гынат, шочмо Морко кундемыш пашам ышташ толаш кумылжо улмым ыш шылте.
Мария Каменская гай чолга ӱдыр-влак таче ялозанлыклан моткоч кӱлыт!