Йошкар-Оласе «Лира» йоча сымыктыш школлан тений 30 ий темеш. Лӱмгече лӱмеш 3 декабрьыште М.Шкетан лӱмеш Марий национальный драмтеатрыште кугу концерт лиеш.
Ты учрежденийым 1992 ийыште Йошкар-Оласе 18-ше №-ан школ пелен почмо. Икымше директорлан Т.А.Шавкуненком шогалтыме, 1995 ий годсек школым Марий Эл Республикысе тӱвыран сулло пашаеҥже А.С.Речкина вуйлата.
Тыште 11 пӧлкаште (музыкальный, художественный, хореографий, театральный да молат) 900 йоча тунемеш, 50 утла туныктышо пашам ышта.
Йоча сымыктыш школ пелен республикыште икымше гана фольклор пӧлкам почмо. Тушто 20 усталык коллектив уло. Нунын кокла гыч иктыже – «Узоры» мурышо да куштышо йоча образцовый ансамбль, «Мозаика» вокал да эстраде йоча образцовый студий. Тунемше-влак тӱнямбалысе, российысе, республикысе конкурслаште шуко гана сеҥыше радамыш лектыныт. Самырык музыкант ден куштызо-влак Болгарийыште, Венгрийыште, Финляндийыште, Италийыште, Францийыште, Германийыште да Австрийыште лийыныт.
Кугу кӱкшытыш шумо дене тудо Российысе 50 эн сай йоча сымыктыш школ радамыш пурен.
