Роза дене Йошкар-Олаште 20 октябрьыште Йошкар-Оласе «Марий Эл Арена» манеж ончылно палыме лийна. Тунам эрдене тудо Николай пелашыжым Украинысе спецоперацийыш ужатен. Автобусыш шичмыж деч ончыч пӧръеҥ Роза деке лишеме да «Ит шорт, чыла сай лиеш» мане. Автобус кудалмеке, Роза дене ик жап кутырен шогышна.
– Военный операций тӱҥалмеке, Коля тушко шке кумылын кайынеже ыле. Мый тудым чарышым. Частичный мобилизаций тӱҥалмеке, пелашем «Мыйым садакат наҥгаят» манын да мо кӱлешым эркын наледен шоген. Сентябрь мучаште тудо мобилизоватлыме-влак спискыш ыш логал. А 10 октябрьыште Морко военкоматыш шке йыҥгыртен да повестке толын але укем йодын. Тунам Колялан повестке лийын огыл. Пелашем военкомат пашаеҥлан шке данныйжым коден да, поветске толмеке, йыҥгырташ ойлен. Эрлашыжымак Колялан повестке толын манын телефон дене каласеныт. Мыйын кумылем тодылалтын, но Коля мыйым лыпландарен да чыла сай лиеш манын ӱшандарен, – каласкала Роза.
Ӱдыр-каче Йошкар-Оласе торгово-технологический колледжыште тунеммышт годым палыме лийыныт. Коктынат Морко район гыч улыт. Роза – Кӱчыкэҥер ялын ӱдыржӧ, рвезе – Морко посёлко гыч. Коктынат повар-кондитерлан тунемыныт.
– Пелашем – эн ӱшанле эҥертышем, аралтышем. Койыш шоктышыжо тудын пеҥгыде, шонен пыштымыжым нимом ончыде шукта. Мый денем гын – романтик шӱлышан, ныжыл, – каласкала Роза. – Тудо пушкыдо модыш-влакым эре пӧлекла. Армий деч вара Коля Йошкар-Оласе ик кафеш поварлан пашаш пурен да 20 октябрь марте тушто тыршен.
Кок ий ончыч ӱдыр-каче сӱаным ыштеныт. 15 октябрьыште келшаш тӱҥалмыштлан лу ий темын, Смирновмыт изирак пайремым ыштеныт. Тудо кечын Николай пелашыжлан шкеж гай кӱкшытан пушкыдо маскам пӧлеклен. Эше мӧҥгыштышт Васька лӱман пырыс ила, тудым Коля ик тылзашымак конден.
– Ынде пырысна да кугу модыш маска дене пачерыштына кодынам. Пелашем оптимист шӱлыш дене каен, «Чыла сай лиеш, вучо, пӧртылам!» манын ужатымем годым. Кызыт нуно Ульяновск областьыште туныктымо рӱдерыште улыт. Телефон дене йыҥгыртен кутырена. Мый палем: Колян чыла сай лиеш, тудлан ӱшанем да пӧртылмыжым вучем, – манеш Роза.