Волжский район Нурсола ялыште илыше Т.А.Яранцева кок шочмо икшывым да ныл еҥ йочам шкетынак ончен куштен. А кызыт тудо эше вич икшывылан ешым пӧлеклен.
Икоян ешыште чыланат мураш-кушташ, семӱзгар дене шокташ мастар улыт. Ӱмаште семӱзгарым шоктышо еш ансамбльым чумыреныт. А тений июльышто Яранцевмыт Чебоксар олаште эртыше «Успешная семья Приволжья» конкурс гыч нылымше вер дене пӧртылыныт.
Тӱвыра пашаште
Элнеттӱр ялын шочшыжо Тамара Анатольевна, 1985 ийыште культпросвет училищыште оркестр пӧлкам тунем пытарымеке, кандаш ий Нурсола ялысе тӱвыра пӧртыштӧ музыкальный руководительлан тыршен. Варажым шочмо Элнеттӱр ялысе клубым вуйлатен. Ынде вич ий Тамара Анатольевна Памар селасе тӱвыра пӧртыштӧ методистлан ышта да «Юл сем» калык семӱзгар ансамбльым вуйлата. Тамара Яранцева – Марий Эл Республикысе тӱвыран сулло пашаеҥже, «Душа народа» премийын лауреатше.
Еш пиалым тудо пошкудо Нурсола ялыште верештын, кок шочшан лийын. Но Василий пелашыже дене ойырленыт. Икмыняр жап гыч марийже ӱмыр лугыч лийын. Ӱдыр ден эргыже ешан-шочшан улыт. Людмила чоҥышылан тырша, Ваня эргыже – сварщик. Ковам вич уныка куандара.
Йокрок ынже лий манын…
2010 ийыште Т.Яранцева еҥ икшывым ончаш налаш кумылаҥын. Йошкар-Оласе ик еш гыч улшо 9 ияш Дамирам да 10 ияш Георгийым ешыш конден.
– Тунам пелашем дене ойырленна ыле. Мый шкетын иленам. Да икымше гана еҥ икшывым ончаш налме нерген шоналтенам. Дамира ден Георгий тыматле, пашам йӧратыше лийыныт. Мый денем нунылан илаш пеш келшен. Кызыт Георгий Памар селаште картоным ыштыме предприятийыште тырша, Дамира Йошкар-Олаште МарГУ-што терапевтлан кокымшо ий тунемеш. Когыньыштынат Йошкар-Олаште пачерышт уло. Каныш жапыште мый декем толын каят, – мане Тамара Анатольевна.
2013 ийыште Тамара Анатольевна Волжск оласе тулык да ача-ава деч посна кодшо школ-интернат гыч Никитам конден. Рвезе сайын тунемын, тӱняончалтышыже келге лийын, шуко книгам лудаш йӧратен.
– Тудо Козьмодемьянск олаште шочын-кушкын, варажым йочапӧртыш логалын. Кондымеке, Никита 6-шо классыште тунемаш тӱҥале. Шып, тыматле йоча ыле. Сочиште Дамира ден Георгий дене пырля лагерьыште лийыныт улмаш. Кызыт Никиталан – 21 ий. Нижний Новгород оласе ик институтышто юристлан кумшо ий тунемеш, – ойла Т.Яранцева.
Поро кумылан ӱдырамаш нелырак койышан йочанат кумылжым савырен моштен. Ик тыгай ӱдырым тудлан Волжск оласе опеке да попечительстве пӧлка гыч ончаш налаш темленыт. Наташа – еш гыч шылын куржшо ӱдыр.
– 2014 ий 18 июньышто 13 ияш Натальям мӧҥгӧ кондышым. Вич кече гыч тудо 14 ийым темыш, да паспортым нална. Вара пачерым налаш черетыш шогална. Мутым эре колыштын, пашалан кожмак кушкын. Кугыеҥ гай чыла ыштен моштен. Тунемаш чот кумылан ыле, но южо предмет нелынрак пуалтын. Ме икте-весе дене эре икойыш шуынна. Тачат тудын дене мутланена. 18 ийым темымекыже, Наталья шке пачеран лие, – ойла Т.Яранцева.
Миша, Саша, Валерия, Алёша, Богдан…
Икшыве-влак кушкыт да сурт гыч лектын каят. Тыге нунын деч посна сурт пустаҥеш, кумылат вола. Тидымак шотыш налын, Тамара Анатольевна 2018 ий мартыште «Журавушка» социально-реабилитационный рӱдер гыч йыгыр икшывым, Миша ден Сашам, тений августышто ик еш гыч улшо 10 ияш Валериям, 8 ияш Богданым, 13 ияш Алёшам ончаш налын.
Умбакыже 7 октябрьыште лекше номерыште лудса.