Шем пызлыгичкым кошташ сайрак. Кылмыктыме годым пайдале танин йомеш.
Ты саска шӱм-вӱргорно черан да диабетик-влаклан поснак пайдале. Тыгак тудо давленийым волта, инфекций чер ваштареш кучедалеш, лыпландара да сайын мален колташ, мӱшкыран-влаклан токсикозым сеҥаш полша, шинча пӱсылыкым саемда, пушкедыктыме годым пайдале.
Шем пызлыгичке сокым кечеш кум гана ик-кум совла дене пел шагат ончыч йӱман. Але кажне кечын вич-шым саска дене кочкаш лиеш.
Коштымо саска дене лемым ямдылаш лиеш. 200 мл шокшо вӱдыш 20 грамм коштымо саскам пыштыман, изи тулышто лу минут шолтыман, вара 20 минут шинчыктыман. Шӱрыман. Лемым пел стакан дене кечеш кум-ныл гана йӱман. Лем палемдыме чер-влакым веле огыл эмла, тыгак вийым ешара, иммунитетым пеҥгыдемда.
Ик литр шокшо вӱдыш куд кугу совла тыгыдемдыме коштымо лышташым пыштыман да пел шагат шинчыктыман. Лемым кечеш кум гана ик стакан дене йӱман. Тыгай чай вӱрым нугыдемдаш полша да давленийым волта.
Тромбозан, пагар да шолыгорно йоран еҥ, колит, запор дене орланыше-влаклан шекланыман.