Ты саскам икымше кылме деч вара погыман. Але 12 шагатлан морозильникыш пыштыман. Тунам саска гыч кочыжо пыта, туддене тамле да пайдале лемым ямдылаш сай.
Йошкар пызлыгичкым мясорубко гоч колташ да сакыр дене варен аралаш лиеш. Але сокым пунчал налыт да морозильникыш кылмаш пыштат, тудым телым чайыш ешараш сай.
Сиропым шолтен кертыда. Ик кило саска гыч сокшым пунчал налман, вара тушко 600 г сакырложашым ешарыман. Сиропым холодильникыште аралыман. Тудо ревматизм, авитаминоз, вергыште кӱ улмо, малокровий, вий уке годым пайдале, иммунитетым пеҥгыдемда, аппетитым саемда.
Пызлыгичке чай кылмен черланыме деч арала. Кок кугу совла коштымо пызлыгичкым, ик кугу совла коштымо (але кылмыктыме) шемшоптырым, ик кугу совла коштымо шемшоптыр лышташым термосыш пыштыман, вӱдым темыман да йӱдвошт шинчыктыман. Вес кечын чай семын кечыгут йӱман. Пызлыгичкым шуанвондо саска дене пырля термосыш пышташ гын, чапле витаминан чай лиеш. Пызлыгичке чай вергылан да мокшлан пайдале. Тыгак пагарын да шолын пашаштым саемда.
Пызлыгичке дене мӱшкыран ӱдырамашлан, нугыдо вӱран еҥлан, тыгак пагарын кугу кислотностьшо, ишемий годым, инфаркт да инсульт деч вара эмлалташ ок лий.