Шыжым шӱргӧ коваштылан поснак тӱткышым ойырыман. Кеҥежымсе шокшо кече деч вара шӱргӧ кукшо лиеш, тушто тамга-влак лектедат, сандене коваштым вӱдыжтарыме, митательный элемент дене пойдарыме да аралыме процедур-влакым ышташ жапым муаш тыршыман.
Крем, маске…
Шыжым косметике коваштым вӱдыжтарыше да питательный лийшаш. Шокшо игечыште куштылгырак крем дене пайдаланена гын, шыжым нугыдырак текстуран кремым кучылтман. Йӱдлан йыгыме крем нергенат мондыман огыл – тудо коваштылан кеҥеж деч вара тӧрланашыже полша. Шӱргылан сыворотко-влак пеш пайдале улыт. Шыжылан витаминан, гиалуроновый кислотан, коллагенан сыворотко-влак келшен толыт. Маске-влак коваштым питательный элемент-влак дене пойдараш полшат.
Пилинг
– Юалге игечыште коваште эркынрак уэмдалтеш. Садлан шӱргӧ тӱсдымӧ да кукшо лиеш. Тыгай годым пилингым ышташ пайдале. Тудо регенеративный манме процессым вияҥда, шӱргыштӧ лекше тамга-влакым пытараш полша. Ферментан пилингым ышташ тӱҥалза. Тыглай шӱргӧ коваштылан арнялан ик гана, коян коваштылан арнялан кок гана, кукшо коваште годым лу кечылан ик гана ыштыман.
Гликолевый, азелаиновый, салициловый кислота-влак тыгак коваштым уэмдыме процессым вияҥдаш да тошто коваште деч утлаш полшат.
Шун гыч маске
Шӱргылан маскым шкеат ямдылен кертыда. Аптекыште але кевытыште кукшо косметический шуным налза, тудым изи пакетлаште ужалат. Эмалированный атыш шуным леве вӱд але ужар чай дене лугыза, маске ӱмбал гай нугыдо лийшаш. Тушко коваштыланда келшыше 2-3 чӱчалтыш эфирный ӱйым ешарыза да сайын варыза. Маскым шӱргыш йыгыза да 10 минут кучыза. Маскым мушкын колтымеке, шӱргым тоник дене эрыктыман да коваштым вӱдыжтарыше кремым йыгыман.
Кевытлаште тӱрлӧ тӱсан шуным ужалат. Шеме да ошо, мутлан, коян коваштылан келшен толыт. Нойышо шӱргӧ коваштылан ужар шун дене пайдаланыман, кукшо коваште годым йошкар шуным кучылтман. Канде ден кына шун чыла тӱрлӧ коваштылан келшен толыт.
Шӱргылан – эмшудо
Вӱдыжгӧ ванный-влак чыла тӱрлӧ коваштылан келшен толыт. Нуно коваштым сайын эрыктат, пор-влаклан почылташ полшат. Кукшо коваштан еҥ-влаклан тыгай ванныйым арнялан ик гана ыштыман, а коваште коян гын, арняште кок-кум ганат ышташ пайдале.
Кок кугу совла коштымо эмшудыш (висвис, шалфей, лопшудо вож) кок литр шолшо вӱдым ешарыза, атым петырыза да пел шагат шинчыктыза. Тылеч вара вартышым уэш шолаш пуртыза да изи тазыш опталза. Тыгай вартыш ӱмбалне шӱргым 10-15 минут кучыман. Шокшо вӱд дек шӱргым чот чак лишемдыман огыл. Уке гын тыгыде вӱргорно-влак пудешталт кертыт.