«Кугарня» газетна тендан деке ятыр оҥай материал дене вашка.
«Шулдыран пагыт» лаштыкыште Палантай лӱмеш тӱвыра да сымыктыш колледжын Калыкле сымыктыш гимназийыштыже йоча-влакым кӱсле дене шокташ туныктышо Валентина Рожкова нерген каласкалена.
«Тӱрлӧ тӱсан Марий кундемна» лаштык Индий гыч врачлан тунемаш толшо Анкит Каушик дене палымым ышта.
«Корнывожышто вашлиймаш» лаштыкыште Медведево район Юбилейный посёлкышто илыше чолга пӧръеҥ Анатолий Павлович Степанов нерген каласкалена.
«Кугарнягудын» унаже – Марий Эл Республикысе тӱвыран сулло пашаеҥже, марий диктор Аркадий Сергеев. Тудын илыш да паша корныжым корреспондент Зоя Тимофеева йодыштын.
«Сылнылык тӱня» лаштык «Марий кеҥеж» манме проект почеш шукталтше мероприятий-влакым радамла да Евсеев лӱмеш Национальный тоштерыште лийше «Культурный маркет» мероприятийым почын пуа.
«Святой черке пелен» лаштыкыште сентябрьлан черке календарьым пуымо да 11 сентябрьыште палемдалтше кече дене палдарыме, ты кечын мом ышташ кӱлмӧ шотышто возымо. Тудо Христос ончыч толшо да тудым тынеш пуртышо святой Иоанн пророкын вуйжым руалме кече маналтеш.
«Тазалык-эсенлык» лаштык агытанора ден матрушкан чай-влакын пайдашт нерген каласкала, вӱршудо дене эмлалташ темла.
11 сентябрьыште Марий Эл Республикым вуйлатышым сайлаш тӱҥалына, кандидат-влакланат посна лаштык-влакым пӧлеклыме. Ончычсо семынак «Арнян вӱршерже», «Кугарнян кастене» да моло лаштыкыштат увер-аҥар, пайдале ой-каҥаш ятырак савыкталтыныт. Лудса «Кугарня» газетым!