14 августышто Öрша селан кечыжым эртарышна.
Тений Öршалан 162 ий темын. Пайремыште шуко уна-влак ыльыч: тиде селанак шочшыжо, кызыт Советский муниципальный районым вуйлатыше С.М.Халтурин, Вечын селасе илемым вуйлатыше В.Г.Кукарев, тӱвыра пӧлкам вуйлатыше Я.А.Ефремов, Советский районын военный комиссарже Е.А.Лукоянов.
Пайремыште эн кугу ийготан еҥ-влак Л.Н.Бусыгина ден Е.А.Халтуринам, шуко шочшан ава Люба Акуловам да тудын Надежда ӱдыржым, эн изи йочам, 25 ий пырля илыше вате-марий Наталия Викторовна ден Сергей Михайлович Халтуринмытым саламлышт. Пайрем деч икмыняр кече ончыч Сеҥымаш парк, клуб, черке, школ йыр шудым солымо да поген налме. Ял калык пеш тыршен, шукыштым Таумут да пöлек дене палемдышт. Тыгак эн сай пöрт озалан, Украина мландыште тынысым аралыше-влакын лишыл еҥыштлан пӧлекым пуышт, сар гыч сусырген толшо Андрей Александрович Акуловлан РФ Обороно министерствын Таумутшым кучыктышт.
Пайремыш погынышо-влакым муро да куштымаш дене Öрша клубын, Кужмара да Колянур ялла гыч толшо коллектив-влак куандарышт.
Пайремым вӱдышӧ-влак Диана Топорова ден Наталия Халтурина Öршан историйже дене палдарышт, Татьяна Нагаева презентацийым ончыктыш. Кидмастар-влак З.Иванова ден Ю.Нагаев пашаштым ончыкташ луктыныт. Библиотекарь Н.Ф.Полушина «Село моё, село родное» да «Рисую лето» выставке-влакым ямдылен. Марий йылмым туныктышо Р.Г.Антропова йоча-влакын газетлаш возымо заметкан альбомжым ончаш луктын.
Пайремыште Р.Г.Антропова, Н.Ф.Полушина, МарГУ-н студенткыже Ю.Мочалова йоча-влакым модыктеныт. Даниил Репин, Яна Репина, Аделина Полушина, Никита Халтурин, Ангелина Мочалова, Настя Чемекова ял, кеҥеж нерген почеламутым марла пеш сылнын лудыч да куштышт.
Куандара: пайремыш шукын марий тувыр дене толыныт ыле. Мутлан, Зоя Геннадьевна Репина Курыкмарий район гыч, тышке марлан лектын да «Молочный родник» организацийыште дояркылан 40 ий пашам ышта. Злата ден Даниил уныкаже-влакланат марий вургемым урген чиктен.
Öрша калык пайремлан поян ӱстелым поген. Туарам, салмамуным, команмелнам, мӱйым да моло сийымат конденыт. Пӱртӱс лоҥгаштак шурпам да пловым шолтеныт.
Тиде пайремлан тӱвыра пӧртым вуйлатыше Н.Топорова ден культорганизатор Л.Полушина вуйын шогеныт. Чылалан кугу таум ойлена. Пайрем моткоч келшен.
Ӧрша кундемыш пурышо Жиган, Кӧрдымучаш, Марий Ӧрша яллаште 196 суртышто 586 еҥ ила.
Роза Антропова, Öрша школышто марий йылмым туныктышо.
Советский район.
Авторын альбомжо гыч налме фото-влак.