Йыгыр пелашан, йыгыр уныкан писатель
Марий писатель-прозаик, редактор, журналист, Марий Эл Республикысе тӱвыран сулло пашаеҥже, «Марий книга издательстве» савыктыш пӧртын директоржо Юрий Ильич Соловьев 4 июньышто 60 ияш лӱмгечыжым палемда.
Шернур район Марисола воктенысе Купсола ялеш шочын-кушкын. Марисола школышто тунемын. Илышыште йол ӱмбалне пеҥгыдын шогышо, шонымашке шуаш тыршыше писательын усталык пашаже тӱвыргӧ лектышан. Кусарыме пашамат ятыр ий шукта. Тудо лудшо-влаклан 11 книгам пӧлеклен, чонеш логалше темым тарватен. Юрий Ильич 1990-ше ийлаште «Кугарня» газетыште тыршен, 1998-2001 ийлаште тӱҥ редактор лийын. Шукерте огыл «Литературная газета» савыктышыште Ю.Соловьевын «Был у нас друг» ойлымашыже лектын.
– Шочмо ял, родо-тукым кыл ик эн шерге. Юрий Ильич, йоча жапым шарналтен, ача-авада, иза-акада, шольыда нерген ала палдарен кодеда…
– Ачам Илья Ефимович механик лийын. Авам Ольга Ивановна совхозышто шала пашам ыштен, пытартыш лучко ий тудо сӧснам ончымаште тыршен. Тиде моткоч неле паша ыле. Авамлан ме сӧснам пукшаш, вӱтам эрыкташ полышкалаш коштынна. Ты пашаште сай лектышым ончыктымыжлан тудым Йошкар Знамя орден дене палемденыт.
Ме ешыште шым икшыве кушкынна: акам, изам, ме, йыгыр-влак (мыйын йыгыр пелашем уло), кок шольым да шӱжарем. Люба акам Н.Крупская лӱмеш Марий пединститутыш тунемаш пурен ыле, но нелылыклан кӧра кудалтыш. Тудо эре чоҥымо пашаште прораблан, мастерлан пашам ыштен. Кок йочаже уло. Кызыт пенсийыште.
Володя изам, 1990-ше ийлаште Марисола совхоз шаланымеке, Йошкар-Олаште Троицкий черке пелен чоҥышылан, ачалкалышылан пеш шуко жап тыршен. Кызыт тудо сулен налме канышыште, Купсола ялыште ила.
Саша, йыгыр пелашем, Володя изам дене пырля черке пеленак строительный бригадыште пашам ыштен. А Йыван шольым пеш кужу жап вахте дене Сибирьыш, Якутийыш, Краснодарский крайыш да моло вереат нефтьым кычалаш коштеш. Вес шольымат тыгайрак пашам шукта.
Галина шӱжарем Крупская лӱмеш пединститутым тунем пытарен, тӱрлӧ школлаште математикым, информатикым туныктен. Ынде лучко ий тудо Красноярский крайыште, Таймырысе Хета посёлкысо школышто нине предмет-влакым туныкта. Туштак марлан лектын.
Умбакыже 3 июньыште лекше у номерыште лудса.