Марий тӱвыра рӱдерын «Сылнымут алан» проектше почеш ты гана лудшо-влак самырык поэтессе-шамыч Алёна Яковлева да Надежда Эмыкан дене вашлийыч. Вашлиймаш МарГУ-н книгагудыштыжо эртыш.
Алёна кок, а Надя ныл почеламут сборникым савыктен луктыныт. Коктынат школыштак возаш тӱҥалыныт, кажне кечын мастарлыкыштым шуарат. Но кажныжын поэзийышт – шке тӱсан да койышан. Тӱҥжӧ – нунын почеламутыштышт илыш коеш, ала-кушеч ала-мом шонен лукмо огыл. Палыме поэтессе Альбертина Иванова ÿдыр-влакым мокталтыш, поэзий аланыште пеҥгыдын йол ÿмбалне шогымышт нерген ойлыш.
Алёна ден Надя почеламутыштым лудыч, кӧргӧ чоныштым почыч, муралтышт.
Вес тыгай вашлиймаш 20 апрельыште «Ончыко» журналын коллективше дене лиеш.