«Демографий» нацпроектын «Спорт – норма жизни» федеральный проектше почеш Марий Элысе кугыжаныш спорт организаций-влаклан субсидий полыш ныл ий почела ойыралтеш.
Тений Йошкар-Оласе футбол да регби дене модмо спорт школлан футбол манишкым, мече-влакым, капкам налме.
«Сай качестван тыгай профессиональный инвентарь-влак дене тренировкым эртарена. Икмыняр ужашыжым ме районласе спорт школлашке колтена», – ойлен ты спорт школын директоржо Александр Ненашкин.
Ты проект почеш тений Волжск оласе спорт полатым ачалаш 38 утла млн теҥгем ойырымо. Тушто электроснабженийым, вӱдпучым, канализацийым, вентиляцийым, отопленийым, оролымо теле устройствым да сигнализацийым вашталтышаш улыт. Тыгак спорт инвентарьым налыт.
