2021-2025 ийлан Марий Эл Республикым вияҥдыме да газифицироватлыме программе почеш 2022 ийыште У Торъял, Советский, Оршанке районлаште 7 межпосёлковый газпучышто строительно-монтажный пашам шукташ палемдыме.
Тыгак Звенигово район Какшамарийыште газораспределительный станцийым чоҥышаш, суртла шумеш 100 наре метр пучым шупшшаш улыт. 15 населенный пунктысо 2 тӱжем утла пӧрт ден пачер канде тулан лийыт. Советский, У Торъял да Оршанке районлаште кум газпучым тений идалык мучаш марте ыштен шуктышаш улыт, молыжым – 2023 ийыште.
ТЫГОДЫМАК 2021 ийысе планым тӱрыс шуктымо.
«Газпром газораспределение Йошкар-Ола» газпучым Курыкмарий, Кужэҥер, Волжский, Звенигово да Шернур районлаште шупшмо да сдатлыме. Тыге 16 населенный пунктысо 650 суртыш канде тулым пуртымо, чумыржо 33 км наре пучым шупшмо.