4-20 февральыште Пекин олаште (Китай) Телымсе Олимпийский модмаш эртаралтеш. Спорстмен-влак спортын 15 тӱрлӧ видыштыже да 109 дисциплиныште таҥасаш тӱҥалыт.
Лудшына-влак олимпиадым ончат мо? Шкешт спорт дене кылым кучат?
Татьяна АЛЕКСАНДРОВА, Морко:
– Мутат уке, мемнан командылан тургыжланаш тӱҥалам, сеҥымашым тыланем. Телымсе Олимпиадыште биатлон да фигурный мунчалтымаш келшат.
Мый шкеже куржталаш пеш йӧратем. Кызыт «Горячий снежок» телым куржталме челленджыш ушненам. Тиде таҥасымашым куржталаш йӧратыше-влакын «Айвика» клубышт эртара.
Евгений НИКИФОРОВ, Йошкар-Ола:
– Олимпиадыште ече дене коштмым, биатлоным да фигурный мунчалтымашым ончаш тӱҥалам.
Школышто тунемме годым телым ече дене коштынам, 1-ше, 2-шо верлам налынам. Студент пагытыште регби дене заниматленам. Кызыт мӧҥгыштӧ зарядкым ыштем, ола мучко ик-кок шагат наре кошташ тыршем.
Мый Сапаев лӱмеш опер да балет театрыште фотографлан пашам ыштем. Тиддеч посна спорт таҥасымаш-влакым: регбим, художественный гимнастикым, куржталмым, фигурный мунчалтымашым – фотографироватлаш йӧратем. Кок вережат мотор позым, эмоцийым ужын шуктыман! Южгунам тыгай мероприятий-влакым икмыняр шагат штатив деч посна войзаш перна, кид ноя. Садлан мый сай физический формышто лийшаш улам.
Надежда УТКИНА, Ижевск ола:
– Самырык годым баскетбол дене модынам. Кызытат спорт дене кылым кучем. Шуко коштам, южгунам тоям кидышкем налам. Тыге кечеш 8 меҥге погына. Эрдене Стрельникован методикыж почеш шӱлымӧ гимнастикым ыштем.
Телымсе Олимпиадым ончаш шонем, поснак Российысе финн-угор спортсмен-влакын таҥасымыштым эскераш тӱҥалам.