Тудо чатка капкылан, ший памаш гай яндар йӱкан да лывырге кид-йолан. 17 ияш гына, а усталыкше, мастарлыкше мучашдыме. Лыжган муралта, сылнын кушталта. Тиде – Советский район Кужмарий селаште шочын-кушшо, И.С.Палантай лӱмеш тӱвыра да сымыктыш колледжыште хор пӧлкаште кокымшо ий тунемше Эльмира Усова. Тудо Кужмарий тӱвыра пӧртысӧ «Эр ӱжара» коллективышке, МарГУ-со «Марий мурсем» ансамбльышке коштеш.
Эльмиран чолгалыкше чыла вере палдырна. Тений «Ӱдырсий» конкурсышто шочмо Советский районжын чапшым арала. Тудо усталык шӱлышан гына огыл, марий йылмым, тӱвырам аклыше, йӧратыше ӱдыр. Ача-ава шочшыштым изинек тыге куштеныт.
Кок кочажат – гармоньчо
Эльмира ныл ияш мураш, кушташ тӱҥалын гын, 3-шо классыште тунеммыж годым 9 ияш ӱдыр икымше гана шкетын сценышке лектын.
– Кок кочам тале гармоньчо лийыныт. Кокам Вера Дмитриевна Мочаева усталык шӱлышан, концертлаште выступатлаш йӧрата. Ача-авамат ансамбльыште муреныт-куштеныт. Тыге мыят изиэм годсек усталык шӱлышан кушкынам. Йочасадыште воспитательнице Анна Владимировна Иванова марий мурылан, куштымашлан шӱмаҥден. Тудланат таум ойлымо шуэш. Школышто музыкым туныктышо Александр Николаевич Пуртов мылам кугун полшен. Марий да руш мурым шкетын муренам. 3-шо классыште Кужмара тӱвыра пӧртысӧ «Изи шӱшпык» йоча ансамбльышке мураш кошташ тӱҥальым. А 5-ше классыште «Серебряный башмачок» коллективышке ушненам, – мане Э.Усова.
Школыштат ойыртемалтын
Э.Усова школын чапшым кеч-куштат арален. Тудо районысо муро-куштымаш дене кылдалтше тӱрлӧ конкурсышто призовой верла дене чӱчкыдын палемдалтын.
Спорт таҥасымашлаштат ойыртемалтын, почеламутым сылнын лудын моштен.
– Изиэм годсек писын куржталам, ече дене талын мунчалтем. Школысо, районысо кросслаште эре ончыл верлашке лектынам. Почеламутым сылнын лудмо школысо конкурслаште икымше я кокымшо верым шуко гана налынам, – ойла тудо.
Чолга студентке
Эльмира тӱрлӧ конкурсышко ушнаш тырша:
– Кодшо ийын Ростов-на-Дону олаште эртаралтше ик конкурсышто мый кумшо вер дене палемдалтым. Тушко марла мурымем видеошко войзен колтенам. Тыгак Озаҥыште лийшаш «Содружество талантов» конкурсышко ушнаш шонем. Тидлан вокал дене туныктышо Надежда Николаевна Захарова дене ямдылалтына, – манеш студентке.
Кок коллектив
Кужмарий тӱвыра пӧртысӧ «Эр ӱжара» ансамбльышке 8-ше класс гыч коштеш.
– Тушко тӱрлӧ ийготан еҥ-влак погынат. Коллективым Кужмарий клуб вуйлатыше Александр Николаевич Пуртов вуйлата. Балетмейстерна – Маргарита Викторовна Досназарова. Марий куштымаш деч посна ме удмурт, башкир, китай, индий, итальян, испан куштымашым тунемынна. Ансамбль дене Коми Республикышке миен коштынна. Мый коллективыште эн самырык улам. Репетицийышке чылан ик жапыште погынен огына керт. Шукын пашам ыштат, – каласкала ӱдыр.
А «Марий мурсем» ансамбль мо дене келшен? йодмемлан тыге вашештыш:
– Участник-влак чыланат марий улыт. Кӱлеш годым полшат, ой-каҥашым пуат. МарГУ гыч веле огыл, моло тунемме верла гыч ӱдыр-рвезе-влак коштыт. Арнялан кок гана погынена. Лиеш гын, репетицийышке кажне кечын коштам ыле. «Марий мурсем» ансамбль мыланем вий-куатым пуа, кумылым нӧлта.
Колледж деч вара Эльмира МарГУ-шко марий йылмым да литературым туныктышлан тунемаш пураш шона. Марий муро-куштымашымат илышыштыже тӱҥ верышке шында.