Мемнан Марий Элна эн мотор! Тиде ой дене чыланат келшат, шонем. Ме еш дене Марий Элысе памаш да ер-влакым, ямле, сылне верлам ончен кошташ йöратена, кажне кеҥежым икмыняр кечым тидлан ойырена. Шуко гана Марий Швейцарий нерген колынам, сандене августышто Кужэҥер велыш кӱ курык деке миен толаш кумыл лекте.
Тиде сылне вер нерген шӱдö гана колмеке, ик гана ужын толманак манын шоналтышым. Кызытсе илышыште технике виян, сандене навигатор тыманмеш намиен шукта.
Тыге тора корныш лекна. Кече пеш сай, утыжым шокшо огыл, йӱр пылат ок кой, толын шуна веле. Шинча ончылно кӱшычын тыгай сӱрет почылтеш: ӱлнö чодыра гӱжлен шога, корем коеш, памашын йыргыктен йоген лекме йӱкшö шокта, машина-влак рат дене шогат. А каналташ толшыжо мыняре-е! Йоча-влакат вожатыйышт дене пырля пеш юарлат ыле.
Корно дене ӱлыкö волена, а тушто олымбал, чапле ӱстембал, чайым шолташ лӱмын тулото вер улыт. Сортам чӱкташ верым ыштыме, а вӱдым лотос пеледыш гай йӧнештарыме вер гыч налман. Мийымына годым йӱштылалт лекташ черет ыле, чылашт дене марла саламлалтна, изиш мутланышна. Мушкылт лекташ пеш сай ыштыме, йöнан вер. Рушлат, татарлат, марлат мутланыме шокта, памаш чылаштым тамле вӱдым налаш, йӱштылалт лекташ тыгай сöрал верыш конден! Черет писын эрта. Мушкылтын, вӱдым налын, южышт каят веле, а тора гыч толшо-влак шокшо чайым йӱын шинчат, чай шудыжо тушто мыняре-е, пого да шолтен йӱ веле. Ме пеленна самоварым налынна ыле, сандене шокшо чай пӱртӱсыштö пеш тамлын кайыш.
Верысе калык арулыкым эскера. Тиде сылне Марий Швейцарийыште каныме тат кужу жаплан ушеш кодеш. Тыгай мотор верыште меат икмыняр фотом ыштышна.
Роза Антропова, Советский районысо Öрша школышто марий йылмым туныктышо.
Пагалыме лудшына-влак. А те Марий Элыште могай ямле верлаште лийында? Фотом редакцийыш колтыза, ты вер нерген изирак текстым возыза. Кум эн оҥай пашан авторжылан пӧлек лиеш. Фото-влакым сентябрь мучаш марте вучена.
