Пеледыш кажне ÿдырамашын кумылжым налеш, чонжым савыра. Тÿняште моткоч шуко тÿрлö пеледыш-влак улыт, шотленат от пытаре. Кызыт тыгай сылне аршашым пакчаште поген пурташ але кевытыште налаш веле огыл, а эше шке кид дене ыштен ончаш лиеш. Теве Кужэҥер районысо Тошто Йӱледÿр ялын ÿдыржö Людмила Рябинина моткоч сылне роза, тюльпан аршаш-влакым ыштылеш. Тудын пашажым ончен, куаныде огеш лий.
Самырык кидмастарын аршашыже-влакым кеч-кö чын пеледышлан шотлен кертеш. Тӱжвач ончалмаште чылт илыше пеледыш гай коеш, кидышке налме шуэш. Тиде мыйым изиш öрыктарыш гына огыл, а кугешнымаш кумылым лукто. Тыгай сöраллыкым шочыкташ мыняр шинчылташ, тыршаш кÿлеш. Тидлан чытымашет гына ситыже. Тыгай мотор, сылне аршашым ышташ лывырге кидан лийме гына шагал, а эше шке пашам йöратен, чылажымат шÿм вошт колтен моштыман. Людмилан чыла тидыже уло.
Людмила Рябинина Кужэҥер районысо Шÿдымарий школ деч вара Советский районысо Вечын техникумышко повар, пекарь, кондитер специальностьлан тунемаш пурен. Ик жап Йошкар-Оласе «Колос» пекарньыште пашам ыштымеке, машиностроительный заводышко куснен. Кызытат туштак тырша.
Самырык ÿдырамаш 4 ий ончыч тыгай кидпашалан кумылаҥын. Пеледышым посна аршаш семын веле огыл, корзиҥгашкат сöралын шынден мошта.
«Пеледыш-влакым Интернет соцсетьыште ончен ышташ тунемынам. Ӱдырамаш-влакын пайремышт вашеш йолташ ÿдыр-влаклан шке гыч пöлекым ышташ кумыл лекте. Кампетке, гофрированный кагаз дене пеледыш аршашым ыштен ончышым да нунылан пöлеклышым. Икымше пашам чылалан моткоч келшен, сандене умбакыжат эше вес сынаным ямдылен ончаш шонышым. Вара шке семын сöрастараш тÿҥальым. Пеледышым ышташ фоамиран, изолон материалым кучылтам. Ондак шаблоным ямдылем, вара тудын почеш пÿчкеден луктам да, утюг дене гладитлен, формым пуэм. Кугу пеледышым фэн дене ырыктен, формым пуртем. Мутат уке, тыгай пеледышым вигак сайын ышташ огеш лий, нелылыкат лектеш. Поснак шаблоным сӱретлыме годым моткоч тӱткö лийман да пеледышым чын поген моштыман.
Ик сöрал пеледыш аршашым кок арняште але тылзе жапыште ямдылен шуктем. Чыла пашам Интернет лаштыклашке вераҥдем, кöлан мо кÿлеш, йынгыртен йодыт. Мо гынат, налаш кумылан-влак эре улыт. Тачысе кечылан 30 пеледыш аршаш уло», — каласкала кидмастар.
Людмила кажне кечын манме гай усталыкшым нöлта, пашаже-влаклан у сыным пурта. Самырык ӱдырамаш эре иктымак огеш ыште, вес кидпашам кычалеш. Тиддеч посна бисер дене лывым, ÿпыш пижыктыме резинкым веле огыл ямдыла, тыгак туддене тӱрым тӱрла. А кырыктыме меж дене модыш-влакым ышта. Кидмастарын ойлымыж почеш, модышым меж дене ыштыме годым ондак посна модышлан келшен толшо формым име дене шуркален пуртыман.
Тыге самырык кидмастар шке пашаштыже у деч у технологийым кычалеш. Эше пöртлан кугу пеледышан светильникым ышташ шона. Тек Людан пашаже лектышан лиеш.