Эпидситуаций сайжак огыллан кӧра Марий Элыште утларак ямде улмо режимым 13 сентябрь марте шуйымо. Тидын нерген Марий Элым вуйлатыше Александр Евстифеев увертарен. Указыште вашталтыш: сатулымо рӱдерлаште кафеш пураш посна омса уло гын, тудо пашам ыштен кертеш.
Вакцинаций черын шарлымыжым шагалемда гынат, чаракым кораҥдыме нерген ойлаш эше эр. Июнь дене таҥастарымаште, больницыште эмлалтше-влак кум пачаш шукемыныт. Колышо-влакат ешаралтыныт: уло пандемий жаплан 24 процентше июльышто ӱмыр лугыч лийын. Утларакшым кугурак ийготан-влак черланат: 65 ий деч кугурак-влак (37,6%), 50-64 ияш-влак (32%).
Вакцинацийым эртыше-влак кокла гыч черланыше-влак моткоч шагалын улыт – 0,1 % наре. Прививкым ыштыме деч вара черланыше-влак коклаште колышо уке. Черланеныт гынат, чер куштылго формо дене эртен.
Правительстве пӧртыштӧ туныктышо-влакым вакцинироватлыме нерген ойленыт. Туныктымо да науко министрын алмаштышыже Нонна Антоничева регионым вуйлатышылан каласен: «Образований сферыште тыршыше 54,3 процент еҥ прививкым ыштен». 1 сентябрьыште парт коклаш 83,5 тӱжем еҥ шинчеш, нунын коклаште икымше классыш
9900 йоча кая (идалык ончыч 8650 лийын). Чылаже Марий Элыште 250 школышто туныкташ тӱҥалыт.