«Единый Россий» партийыште 24 гыч 30 май марте эртыше ончылгоч йӱклымашын лектышыж дене палдареныт. Элна мучко чылаже 10 миллион утла еҥ йӱклымашке ушнен.
Ты пашам эртарен колтымо шотышто республикысе оргкомитетын вуйлатышыже Александр Смирновын палдарымыж почеш, Марий Элыште 25 тӱжем наре еҥ йӱклен. Нуно Кугыжаныш Думыш, республикысе Кугыжаныш Погыныш да Йошкар-Оласе кок округыш сайлымашке ушнаш шонышо кандидат-влакым ойыраш полшеныт. Кугыжаныш Думыш кандидатлан эн шуко йӱкым Евгений Кузьмин поген. 2-шо верыш Лариса Бендер да кумшыш Эдуард Александров лектыныт.
Ушештарена: Кугыжаныш Думыш сайлымаш тений сентябрьыште лиеш. Шыжымсе сайлымашыш кандидат-влак спискым «Единый Россий» партийын Съездыштыже пеҥгыдемдат, тудо 19 июньышто эрта.