ПГТУ-со Чоҥымо паша да архитектур институтын студенткыже Ольга Васильева кок дипломым налме программе дене тунемеш. Ты программым Волгатех ден Кечывалвел-Эрвел Финляндийысе Прикладной науко университет 2019 ийыште подписатленыт.
Вуз-влак коклаште «Экологический инжиниринг» ден «Техническое проектирование инженерных коммуникаций» бакалавр программе-влак почеш кок дипломым налме шотышто договор-влакым ыштыме.
Тышке тунемаш логалаш манын, О.Васильева конкурсым эртен. Тудо кокымшо программыж дене шинчымашым пога: пӧлемыште лӱдыкшыдымылыкым да сай условийым ыштыме технологийым, вӱдым, шокшым пуымо системе ден вентиляцийым да южым пуалтарыме верлам пеҥгыдын йӧнештарыме, тыгак нине системе-влакым автоматизироватлыме шотышто Европысо практикым шымла. Коронавирус пандемийлан кӧра тунеммаш Microsoft Teams онлайн-платформышто эртаралтеш.
«Мый марий ӱдыр улам. Рӱдолаште шочын-кушкынам. Ачам Сергей Ионович Марий машиностроитель заводышто пашам ышта, шочынжо Морко кундем гыч. Авам Роза Альбертовна – воспитательнице, Шернур гыч. Мый Йошкар-Оласе 14-ше №-ан гимназийым тунем пытаренам. Йоча сымыктыш школыш, «Шокто, гармонь» ансамбльыш коштынам. Тидыже кок ий ончыч йоча лагерьыште вожатыйлан пашам ыштымем годым, тыгак университетыште «Мост дружбы» фестивальлан куштымаш номерым ямдылаш полшен. Конкурслаште почеламутым марла лудынам, актёр мастарлыклан тунемаш актрисе Маргарнита Медикован занятийлашкыже коштынам. Студент лиймеке, йоча-влак деке интернатлашке коштмо да тӱрлӧ программым эртарыме – тидыже южгунам педагоглан тунемаш каяш кӱлеш ыле манын шонкалаш таратен. А кызыт такшым инженер лияш шонымашкем шуаш чотак тыршем», – ойла Ольга Васильева.
Кок дипломым налаш шонеда гын, ты статьям шергалаш темлена.
УМБАКЫЖЕ 19 мартыште савыкталтше «Кугарня» газетын 4-ше страницыштыже лудса.