Кодшо ийын Россий Президент В.Путинын кӱштымыж почеш кундемлаште Самырык-влакын военно-патриотический воспитаний шотышто рӱдерыштым ыштыме. Кӱштымашым Российысе 12 кундем вигак шуктен. Республикыштына Юл кундемысе регион-влак коклаште эн ончыч рӱдерым почмо.
Шукерте огыл ты рӱдерыш республикым вуйлатыше А.Евстифеев миен коштын. Тудо корпус-влакым ончалын, йоча-влакын илыме, кочмо условийыштым терген, физподготовко ден военно-патриотический паша кузе шукталтме нерген умылкален.
1 мартыште рӱдерыш у смене миен. А тылеч ончыч (19 октябрь гыч 29 январь марте) тыште У Торъял, Медведево, Советский, Звенигово, Марий Турек, Морко, Шернур районласе да Йошкар-Оласе школла гыч 355 курсант лийын. Тений рӱдерыш каникулышто да профильный сменылаште 3 тӱжем наре подростко толшаш.
Республикын молодёжный политике, спорт да туризм министрже Л.Батюкован мутшо почеш, кодшо ийын рӱдерлан 10 млн утла теҥгем ойырымо, а тений – 37 млн теҥге наре. Республикысе бюджет окса дене школ каникул годым 10-17 ияш йоча-влаклан тунемме сбор ден военно-патриотический смене-влак, организатор-влаклан да ОБЖ предметым туныктышо-влаклан квалификацийым нӧлтымӧ курс-влак эртаралтыт. Тыгак кӱлешан оргктехникым налыт, ачалкалыме пашам шуктат.
Эльвира Терентьева.