Параньга районысо Матародо школышто физкультурым туныктышо Олег Леонидович Золотарёв уло чонжым туныктымо пашалан пуэн, физкультурылан йоча-влакым шӱмаҥден мошта, нунын тазалыкыштым пеҥгыдемда.
О.Золотарёв Матародо школышто 38 ий ышта. Тудын тыршымыжлан кöра тунемше-влак эре ончылно улыт, школын чапшым районышто, республикыште аралат, а южышт спорт мастер марте кушкын шуыныт. Сандене ты кундемыште шочын-кушшо рвезе-влак армийыште куштылгын, сайын служитлат. Армий гыч пöртылмеке, нуно Олег Леонидовичлан кугу таум ойлат. Тунемшыже-влак кокла гыч южышт чемпион дивизийышке логалыныт.
О.Золотарёв Марий пединститутым тунемын пытарымеке, направлений почеш ик ий Параньга посёлкысо школышто туныктен, вара армийыш каен. Службым эртымеке, тӱрлö школлаште пашам ыштен: ондак – Кужэҥер районысо Старсела школышто, вара – Кужэҥер посёлкысо школышто. Умбакыже пӱрымаш шочмо кундемышке конден. Тений мартыште тудо 60 ийым темыш.
«Йоча-влак спортлан кумылан улыт, нунылан мастарлыкым нöлташ полшыман. Спортзалыште рвезе-шамычлан капыштым нöлташ посна верым ыштыме. Тушто силовой подготовко дене заниматлат. Урок деч вара ӱдыр-влак баскетболла модыт. Утларакшым урок деч вара секцийлаште заниматлат. Туризм дене Матародо школ эре ончылно. Туризм дене республикыште веле огыл, Российысе таҥасымашлаштат участвоватлат. Футбол дене посна тренерна уло. Школыштына ече спорт виян, тачат чапланен шога. Тунемше-влак волейбол дене сайын модмышт дене ойыртемалтыт. Полиатлетике дене заниматлат. Матародо школын 4 выпускникше спорт мастер. Иктыж дене пырля тунемынам, кумытшо тунемше-влакем улыт. Нунын коклашке Вячеслав эргымым пуртыман. Тыгак Станислав Егоров тунемшем полиатлон, ече дене спорт мастер. 1-ше класс гыч мый нуным туныктем. Сеҥымашышт дене кугешнем», — ойла туныктышо.
Вячеслав эргыже ачаж семынак илышым спорт дене кылден. Армийыште ече дене спорт мастер лӱмым кокымшо гана налын. Рӱдö военный округысо чемпионатыште участвоватлен. Кызыт тудо Йошкар-Олаште ОМОН-ышто пашам ышта.
О.Золотарёвлан школ – кокымшо сурт, а тунемшыже-влак шке икшыве гае лишыл улыт. Туныктышын мастарлыкшым, уста улмыжым тунемше-влакын сеҥымашышт палдарат. Вет туныктышо огыл гын, шонымо семын кӱкшытыш шуаш огеш лий.