Тиде пагыт кажне тунемшылан поснак вучымо, куанле лийшаш. Но инфекций шарлымылан кöра тений чылажат молгунамсе гай огыл, вестÿрлö, тунемалтдыме. Шукерте огыл школ оралте да тунемме класс мöҥгö дене вашталте, парт кокла – пöртысö ÿстел дене, а туныктышо – компьютер але гаджетыште «илыше» айдемыш… Чыланат у семын тунемаш тунемыч.
Но вашке иктешлыше кугыжаныш экзамен, выпускной-влак лийшаш улыт. А вара – у тунемме ий. Ончылно мом вучыман? Йодыш-влаклан Марий Элысе образований да науко министр Наталья Адамова дене мутланышна.
– Йоча-влак ЕГЭ-м да ОГЭ-м кузе кучаш тÿҥалыт?
– 9-ше да 11-ше класслам тунем пытарыше-влаклан аттестатым налаш ОГЭ ден ЕГЭ-м кучаш огеш кÿл. Тудым кажне выпускниклан пуат, идалыкаш отметке-влакым да руш йылме дене иктешлыше собеседованийым сайын эртымым шотыш налыт.
Калыкын тазалыкшым аралыме шотышто пашам ыштыше орган-влакын темлымышт почеш, ЕГЭ-м кучымо жап тений 8 июньышто огыл, а варарак тÿҥалеш. Ончыкыжым, эпидемиологий ситуацийым шотыш налын, датымат палемдат.
Иктешлыше экзаменым кучаш шонышо-влаклан чыла йöн лиеш. Но Роспотребнадзорын темлымашыже-влак почеш выпускник да организатор-влаклан термометрийым эртыман, а аудиторий-влакым эрыктыман. Тыгак икте-весе коклаште диссанцийым шотыш налман. Эн шуко еҥан экзаменым (руш йылме дене ЕГЭ годым) кок кечылан пайлаш шонымаш уло.
Тений ЕГЭ-м вузыш тунемаш пураш шонышо-влак веле кучат. Тунемаш пураш могай предмет кÿлеш – тугай дене экзаменым кучыман.
– Школлаште да йочасадлаште выпускной пайрем-влак эртаралташ тÿҥалыт мо?
– Ты йодышым тунемме верласе администрацийыште ача-ава да тунемше-влак дене каҥашен рашемдат. Но тыгодым республикысе эпидемиологий ситуацийлан кöра пуртымо мере-влакым шотыш налде ок лий. Ме кызыт министерствыште школым тунем лекше-влаклан торжественный мероприятийым дистанционно эртарыме шотышто каҥашена.
– Йоча лагерь-влак пашам ышташ тÿҥалыт мо? Тÿҥалыт гын, кузе?
– Марий Эл Республик 2020 ийлан йочан тазалыкшым пеҥгыдемдыме пашам тÿҥалаш ямде. Тидлан чыла йöн уло. Образовательный организацийласе да моло тÿрлö лагерьлаш йоча-влакым кунам пурташ тÿҥалмым Российысе ограничительный мере-влакым кораҥдыме деч вара веле рашемдаш лиеш. Ончылгоч ойлаш гын, тиде иктаж июль тылзыште лиеш манын ÿшанена. Лагерьысе смене 14 кече шуйнаш тÿҥалеш.
– У тунемме ийлан иктаж-могай вашталтышым пурташ палемдыме?
– Тунемме ий тÿҥалтыште школ-влак штатный режимыш куснат да ФГОС почеш туныкташ тÿҥалыт.
Цифр-влак:
- 2020 ийыште Марий Элыште 6861 йоча 9-ше классым да 3067 икшыве 11-ше классым тунем пытарат;
- Тений Марий Элыште 10 000 наре икшыве икымше гана йочасадыш кая, тышеч 4 000 йоча – 3 ийыш шудымо. Ньога-влаклан республикыштына 224 йочасад да дошкольный группан 102 школ омсаштым почыт.