– Йоча-влак кушкыт, йöратымаш нергенат шонкалаш тÿҥалыт. А могай ийготышто икшыве дене секс нерген мутланаш лиеш? Мом да кузе ойлыман?
И.Степанова, Советский район.
Йошкар-Оласе перинатальный рÿдерын кÿшыл категориян акушер-гинекологшо Е.С.Николаева:
– Йочалан изинек ойлыман: мо сай, а мо сай огыл, мом ышташ лиеш, а мом уке. Икшыве чыла тидым ойырен, шонкален моштышаш. Ончыкыжым ты койыш йоҥылыш корныш шогалме деч арала. Тыгак капкыл арулыкым эскераш, половой органым мушкаш туныктыман. XXI курымышто илена, кызыт тидлан чыла йöн уло. Ӧрат, кунам ÿдыръеҥ «Мыняр гана мушкылтат?» манын йодмылан «Арняште кок гана» манын вашешта. Мемнан пашаште тыгайымат колаш логалеш…
Йочан кушкын толмыж семын айдемын половой ойыртемже нерген изин-изин ойлаш лиеш. Ӱдыр икшывылан аваже каласкала, эргылан – ачаже. Вате-марий семын малыме нерген ойлаш тÿҥалме деч ончыч йочан кушмо да вашталтмыжым шотыш налман. Кажне икшывын «кÿын шумо» ийготшо тÿрлö. Кушкын шумыжым шижыда гын, вате-марийла малымылан кöра мо лийын кертмым умылтарыза. Половой йöн дене куснышо чер-влак нерген (а мемнан республикыште 25 тÿрлö тыгай чер вашлиялтеш), мÿшкыр пижме, вучыдымо икшыве шочын кертме нерген каласкалыза, ончыкылык илыш шотышто мутланыза. Чын аралалташ туныктыза, контрацептив-влак нерген ойлыза.
Тылеч посна икшыве шке койышыжым эскерышаш, виешлымаш нерген палышаш, ты туткар деч аралалт моштышаш. Кызытсе саманыште тÿрлыжат лийын кертеш: ÿдыр-влакым веле огыл, эрге йочамат виешлат. Икшывым тиде чын деч «шылтен» кушташ тыршыман огыл.