17-22 июньышто республикыштына юнкор-влакын 13-шо слётышт эртаралтеш. Тышке марий Элын тӱрлӧ районласе да пошкудо Татарстан кундемысе школла гыч ӱдыр-рвезе-влак толыныт. Тений слётыш икымше гана Курыкмарий районысо школлаште тунемше йоча-влак ушненыт.
Юнкор-влак Йошкар-Оласе 1-ше №-ан президентский школ-интернатыште погыненыт. Слётысо 28 йоча кокла гыч кажныже марий сылнымутлан шӱман да возымо пашам шуктен шога, «Ямде лий» газет редакций дене пеҥгыде кылым куча.
Чолга ӱдыр-рвезе-влакым тӱвыра, печать да калык-влакын пашашт шотышто министрын алмаштышыже Михаил Матвеев да молат саламленыт.
Йоча-влакын 2019 ийысе слётышт «Марий Эл Республикын 2013-2025 ийлан кугыжаныш национальный политикыже» программе почеш эртаралтеш, Театр идалыклан, республикын 100 ияш идалыкшылан пӧлеклалтын. Ӱдыр-рвезе-влак «Йоча пагыт» тоштерыш миен коштыныт, Марий самырык театрыште спектакльым онченыт, «Ямде лий» ден «Кугарня» газет редакций-влакын пашашт дене палыме лийыныт, МЭТР телеканалыш экскурсий дене миеныт. «Ончыко» журналын тӱҥ редакторжо, поэт Игорь Попов ден самырык сылнымутчо Христина Александрова йоча-влаклан почеламутым возымо шотышто каласкаленыт. Марий самырык театрын актёржо Михаил Александров актёрын пашаж дене палдарен да текстым кузе писын тунемаш лийме нерген каласкален.
Ирина Петрова, Морко район:
– Мый Морко район Смычке ял гыч улам. Ончыч Волаксола школышто, кызыт Кокласола лицейыште тунемам, 10-шо классыш вонченам.
Утларакше почеламутым возаш келша. Возымемым «Ямде лий», «Морко мланде» газетлаште савыктеныт. Илышыште лийше событий-влак, пӱртӱс теме чонемлан лишыл улыт.
Марий сылнымутышто Валентин Колумбын возымыжым лудаш йӧратем. Руш классик-влак кокла гыч Сергей Есенинын да Михаил Лермонтовын поэзийышт келша. Кызыт Зоя Дудинан сылнымут книгажым лудам.
Слётышко икымше гана толынам. Тышке логалаш эре шоненам, а тений йӧн лекте. Сылнымут шӱлышан ятыр йолташым вашлийынам. А марий газет редакцийлашке, театрышке коштмына шуко жаплан ушеш кодеш.