3 октябрьыште Параньга район Яҥгетсола ялыште поэт Михаил Якимовлан шарнымаш чапкӱм почмо. 
Клуб ончылно поэтын шочмо ялыштыже илыше еҥ-влак веле огыл, тыгак тудым шарныше, творчествыжым аклыше-влак ятырынак погыненыт ыле. Пошкудыжо, йолташыже, родыжо… Тора кундем гыч толшо уна-влакым Яҥгетсола калык ялыш пурымаште кинде-шинчал дене вашлийын, эн поро унала ончен колтен.
Тений М.Якимовын шочмыжлан – 90 ий. Поэт 1996 ий 26 октябрьыште илыш дене чеверласен. Тудо Э.Сапаевын возымо «Акпатыр» оперыжлан либреттым возышо семын палыме. М.Якимовын почеламутшылан возалтше муро-влак марий калык мурыш савырненыт, а сылнымутшо кажне лудшын чонжым савыра. Лач тидын нерген чапкӱ воктене погынышо-влак чон почын ойленыт. Поро шарнымаш, кугешныме кумылан ой-влак ятырак йоҥгеныт.
«Авам (Михаил Якимовын акаже) эре каласкала ыле, кузе шольыжо икана йӱреш логалын, мӧҥгӧ чылт ночко толын пурен. «Иктаж капка леведыш йымаке шогалын, йӱр деч шылаш ок лий ыле мо?» ойлем, манеш. А тудыжо вашештен: «Тиде йӱржӧ – родной йӱр. Молан тудын деч шылаш…» Вот ынде шочмо ялыштет, шочмо калыкет пелен, родной йӱр йымалне йывыртен шогет…» – чонжым почо М.Якимовын тукым шӱжарже Раисия Окунева.
Чапкӱм шогалтыме пашам Яҥгетсола ялын старостыжо Эрик Спартакович Данилов ден туныктымо пашан ветеранже Эльвира Виссарионовна Захарова тарватеныт. Нуно окса полышым пуышо да пашам вораҥдарен колташ полшышо кажне еҥлан таум каласышт. Оксам погымо шотышто ойлаш гын, полышым Яҥгетсола кундем калык веле огыл, чумыр республикыште илыше-влакат пуэныт.
И.Речкинын фотожо-влак