Мыскараче-влак Моркышто воштылтеныт

1 апрельым гына Воштылмо кечылан огына шотло. Тыге меат, «Кугарня» газетын пашаеҥже влак, ынде 25 ий «Воштылаш, товатат, сулык огыл» мыскара конкурсым эртарена. Кунам йӧратыме пашам шуктет, лектышыжым ончен куанет. Эн ондак ме 1 апрель вашеш тӱрлӧ районлаште ойырен налме тур лиеш. Эн сай номер-влакым Йошкар-Оласе кугу сценыште ончыкташ кондена. Моло верлаште лийме гын, Моркышто посна тыгай ойырымо турым ик ганат эртарыме огыл. Амалже: тусо верысе мыскараче-влак шкешт конццртым эртарат, а ме тушко ончаш миена да келшыше номерым ойырен налына ыле. А теве 17 майыште «Кугарня» редакцийын пашаеҥже-влак мыскараче-влак дене пырля Морко тӱвыра полатыште чапле, ойыртемалтше номер-влакым гына чумырен, весела муро да мыскара касым эртарышна. Тышке ме вес районла гыч уста артистна-влакым ӱжынна.

Кас кужун шуйнен гынат, ик еҥат зал гыч лектын каен огыл. Утен воштылмо йӱк кумылым веле нӧлталын. Ме чыла мыскарачылан кугу таум ойлена, кажныже оҥай, уста, уке гыч улым ыштен моштышо. Жапше годым ик гана веле огыл икымше вер дене палемдалтыныт да шергакан призым мӧҥгышкышт наҥгаеныт. Ӱшанена, вес ийын 1 апрельысе конкурсна тошто йолташ-влак дене пырля у шӱлыш да у мыскараче-влак дене пойдаралтеш. Ончаш толшо кажне еҥлан  да Морко районышто газетланна эн шуко подпискым ыштыше-влаклан кугу таум каласена.