Россий президентын Юл кундем федеральный округысо полномочный представительжын темлыме «Мемнан Сеҥымаш кечына» (Наш День Победы) акцийым 29 апрельыште Самара область шуя. Интернетыште материал-влак #песнипобедыПФО #нашденьпобеды хештег дене шыҥдаралтыт.
«Сеҥымаш кече» мурым Самара областьыште П.М. Милославов лӱмеш Волжский кугыжаныш калык хор мура.
«Хорна 65 ий жапыште патриотизм шӱлышан шуко мурым калыклан пӧлеклен, кумда элнан культур поянлыкшым мокта, – каласкала коллективым вуйлатышын пашажым шуктышо Виталий Натаров. – Ме уло кумылын ты акцийыш ушненна, тиде мыланна кугу чап!»
Сар жапыште Куйбышев область гыч фронтыш пел миллион наре еҥ каен, тушман ваштареш лӱддымын шогалын. Чаманаш логалеш, пелыже наре пӧртылын огытыл. Тылыште кодшо-влакат геройлын тыршеныт! Тыште легендарный Ил-2 самолетым ыштеныт. Куйбышевым тунам «ешартыш столице» семын онченыт. Сталинын бункержат тыштак верланен. Тышеч уло тӱнялан Совет информбюро лӱм дене Юрий Левитан уверым лудын. Сар пуламыр жапыштак 1941 ий 7 ноябрьыште эртыше военный парад уло тӱнямбал калыкым ӧрыктарен.
Ушештарена: «Мемнан Сеҥымаш кечына» («Наш День Победы») акций муро марафон семын эрта. 8 май марте Юл кундемысе чыла регионышто Сеҥымаш муро тӱрлӧ калыкын йылмыж дене йоҥгаш тӱҥалеш. Композитор Д.Тухмановын семжылан да В.Харитоновын мутшылан возымо «Сеҥымаш кече» («День Победы») мурым шке йылмышкышт кусарен, 25 апрель гыч Мордовий, Удмуртий, Башкирий республикылаште муреныт. Видеороликым февраль-мартыште, «мӧҥгыштӧ шинчыме режимым» увертарыме марте возымо.
Марла Я.Эшпай лӱмеш Марий кугыжаныш филармонийын артистше-влак, А.Искандаров лӱмеш Марий кугыжаныш хор капеллын солистше-влак «Марий кундем» калык семӱзгар оркестрын шоктымыж почеш 26 апрельыште муреныт.