Марий Турек районышто 29 ияш ӱдыр йӱдлан велосипедшым кудывечыште коден. Эрдене велосипед верыштыже лийын огыл. Полиций пашаеҥ-влак титаканым муыныт. Марий Турек посёлкышто илыше 31 ияш пӧръеҥ транспортым шолыштын да ужалаш шонен, но шуктен огыл.
Йошкар-Оласе Ленин проспектыште тыгаяк случай лийын. 16 ияш рвезе йолташыж деке унала миен. Велосипедшым подъездысе кидкучемыш трос дене пижыктен коден. Шагат гыч пӧртылмекыже, велосипед верыштыже лийын огыл.
Волжск олаште илыше ӱдырамаш ик сайтыш коляскым ужалыме нерген уверым пуэн. Ик жап гыч телефонышкыжо банк картыш оксам колтымо нерген серыш толын, туштак ссылке лийын. Ссылке почеш пурымеке, ӱдырамашын картше гыч 8000 утла теҥге йомын.
Шернур районышто илыше 22 ияш рвезе Интернетыште тракторым ужалме нерген уверым ужын. Ужалыше дене кутырен келшен, 189 тӱжем теҥгем картыш колтен. Ик жап гыч «ужалыше» дене кыл йомын.