Марий эстрадыште Провой вел ӱдыр Ксения Юркинан яндар, мотор йӱкшӧ дене муралтымыжым ятырын йӧратен колыштыт. Марий Эл радиошто тудын мурыжо-влакым чӱчкыдын колтат, но сценыште мурызым пытартыш ийлаште пешыже огына уж. Кушко йомын маншат улыт. Каласен кодыман: самырык мурызо кок шочшан ава лийын.
Изиж годым кушташ йӧратен
Эсмекпляк ялын ӱдыржӧ Ксения изиж годсек кушташ йӧратен. Ялысе тӱвыра пӧрт пеленысе куштымо кружокышко коштын. Иктаж-кунам мурызо лиям манын, ик ганат шоналтен огыл. Ачаж велым коваже усталык шӱлышан, мураш йӧратыше улмаш. Мо оҥайже: тудат Ксения Юркина. Коваж деч тетрадьыш возен кодымо мурын шомакше, кассетыш возымо мурыжо-влак тачысе кече марте аралалтыт. Ксения коважын мурыжо-влакым чӱчкыдын колыштын, вара шкежат тидлан шӱмаҥын.
«Изиэм годым пеш вожылшо лийынам. Сценыш лекташ мылам кугу вий-куат кӱлын. Мӧҥгыштӧ караоке почеш муренам», – ойла Ксения.
Бухгалтер олмеш тӱвыра пашаеҥ
Школ деч вара Ксения бухгалтер лияш шонен.
«Эн ончыч Волжск оласе техникумышко бухгалтерлан тунемаш пураш йодмашым пуэнам. Но ала-мо мыйым тушеч кораҥдыш. Тыге йолташ ӱдырем дене кутырен келшен, Палантай лӱмеш тӱвыра да сымыктыш колледжын хор пӧлкашкыже тунемаш тарванышна. Вер уке манын каласышт. Тыге семӱзгар пӧлкашке тунемаш пурышна. Тушто жалейке, флейте, кӱсле, фортепиано, домр дене шоктенна. Мылам эше дирижироватлаш келша. Ме тӱрлӧ кундемлаште, республикнан тӱрлӧ районыштыжо лийынна, Озаҥ оласе да моло конкурсышто участвоватленна», –шарналта студент пагытшым мурызо.
2010 ийыште дипломым налмеке, ӱдыр Волжск оласе ик йочасадыште воспитательлан кум тылзе пашам ыштен. 2011 ийыште Эсмекпляк клубышто пашам ышташ тӱҥалын. Тыгак ялысе «Олык сем» ансамбльым вуйлата. Тудо МарГУ-што этнокультурный рӱдер вуйлатыше специальность дене заочно тунем лектын.
Дуэт дене мураш тӱҥалын
Ксения колледжыште тунеммыж годым «Югорно» бард клубыш (Йошкар-Оласе «Автодор» тӱвыра полатыште Марий тӱвыра рӱдер пелен лийын) мастарлыкшым нӧлташ коштын. Тудым палыме марий мурызо Влад Николаев вуйлатен. Тушто ӱдыр-рвезе-влак муреныт, гитар дене шоктеныт, спектакльыште модыныт. Тыште Ксения тӱшкагудышто ик пӧлемыште пырля илыше Диана Ямбаршева дене гитар почеш мурен. 2007 ийыште «Канде шинча» муро дене Параньга районысо ик ялыште икымше гана сценышке лектыныт. Вара самодеятельный композитор Александр Мамаев нунылан «Йӧратет гын, умылет» мурым пуэн. Но тудым мураш рвезе солист кӱлын. Тыге Палантай лӱмеш колледжыште тунемше Дмитрий Конаков дене пырля дуэт шочын. Ксения ден Дима пырля куд мурым муреныт: «Ӱшанле йолташ», «Кид эҥертышем» да тулеч моло.
«Дима – Шернур вел рвезе. 2015 ийыште дуэт шаланен. Д.Конаков кызыт ешыж дене Курыкмарий кундемыште ила. Туддене возышашлык икмыняр муро уло. Кӧ пала, ала илен-толын возена», – ойла К.Юркина.
Еш – кугу эҥертыш
Кызыт Ксениян репертуарыштыже 16 муро уло. Лу мурым дуэт дене мура гын, кудытым – шкетын. Ончыч гастроль дене Марий Элын тӱрлӧ кундемлаштыже, Пошкырт велне, Эстонийыште лийын. Пытартыш жапыште шуко жапым икшывыже-влаклан ойыра. Ныл ияш Камила йочасадыш коштеш, а икият пелаш Данил аваж дене мӧҥгыштӧ шогылтеш. Антон пелашыже Звенигово оласе ик организацийыште электриклан ышта. Ксения Чакмарий велыш марлан толын да Григорьева фамилийым налын. Вате-марий шочшышт дене пырля кок пачашан пӧртыштӧ илат. Пакчагӧргым шындат.
«2016 ийыште марлан толмем годым пӧртым леведме ыле. Кызыт кӧргыштӧ ачалена, тӧрлена.
Ешаҥмеке да шочшан лиймеке, ончыл верым еш налеш. Камила ӱдырем книга почеш тӱрлӧ заданий-влакым ышташ йӧрата. Сандене туддене пырля шинчын решатлена, тыгак лудына, возена, сӱретлена. Видеоурокым чӱктена, да кушташ тунемына. Данил, мемнам ужын, шке семынже кадыргылеш. Яра жап моткоч шагал. Коктынат але изи улыт, нунын почеш эре коштман», – ойла К.Юркина.
Ксениям кажне кечын икшывыже-влак кечыйол гай ырыктен куандарат. Туге гынат самырык ӱдырамаш паша нерген огеш мондо. Ансамбльым вуйлатыше яра жапше годым тӱрлӧ мероприятий-влаклан сценарийым воза, планым ышта. Ончыкылыклан у муро-влакым возаш шона.