Медведево район Кыдал Озакъялыште илыше Лидия Вениаминовна Кудрявцева яра жапшым кидпашалан ойыра.
Тудо У Торъял район Пикшола ялыште шочын-кушкын. Какшанмучаш школышто шинчымашым поген. Йошкар-Оласе «Патология речи» рӱдерын буфетыштыже пашам ышта.
«Ялыште чыланат кидпашам ыштеныт, сандене мыят тидлан кумылаҥынам. Ондак кызытсе семын мел могыр гыч тӱрлымемлан ковам вурса, йоҥылыш тӱрлымемым уэш рончыкта ыле. А тудо жапыштыже шӱртыжат тенийысе гай лийын огыл, вашке кӱрлын. Тыге эркын тупела могыр дене тӱрлаш тунемынам», – каласыш Лидия Вениаминова.
Аважын, коважын тӱрлымыштым ужын, умылтарымыштым колыштын, изи Лидукат кидпашалан тунемын шуын. Вынер дене марий тувырымат ышташыже логалын. Тыге ӱдыр кидпашалан шӱмаҥ кушкын.
Лидия Вениаминовна тыгак пӱртӱс сӱрет-влакым тӱрла, курчаклан марий вургемым ямдылен ужала. Шер дене сӧрал арвер-влакым ыштылеш, ӱпыш пижыкташ резинке, заколко – чыла уло! Курчак-влакым Английыш, Францийыш, Израильыш, Казахстаныш наҥгаеныт.
Л.Кудрявцева шке мастарлыкшым «Марий вургем» фестивальыште икмыняр ий почела ончыкта. 2015 ийыште кумшо вер дене палемдалтын. Тиде мероприятий деч вара арвержым шукын налын каеныт. Кодшо ийын Чебоксар олаште эртаралтше «Русь мастеровая» всероссийский конкурсышто дипломым пуэныт.
Тошто марий тӱрым тӱрлаш кузе тунемында?
– Кугу таум мый тӱрлызӧ Ираида Александровна Степановалан ойлем. Тудо мыланем икмыняр урокым пуэн. Тыге эркын-эркын тунемам. Кызыт заказ почешат вургемым ямдылем. Паша куштылго огыл, чыла тамгам пален тӱрлыман. Арам огыл марий-влак нерген тамга полшымо дене пален налын кертыныт.
– Шочшыда-влак кидпашалан шӱман улыт?
– Кум ӱдырем уло, кумытынат тӱрлат, шер дене сӧрастарыме ӱзгар-влакым ыштат. Мемнан родо-тукымышто чылан кидпашалан тале улыт. Но кызыт жап шагаллан кӧра кидпаша ӧрдыжеш кодеш.
Кеч-могай пашамат ышташ лиеш: ургаш, пидаш, тӱрлаш, но айдемын тидлан кумылжо лийшаш! А кумыл уке гын, изи солыкат нигунам тӱрлалт ок шу. Лидия Вениаминован тӱрлаш йӧрата, сандене чылажат тудын писын да моторын ышталтеш.