Параньга районысо Олор ялыште «Кас ӱжара» ансамбль 27 ий усталыкше дене еҥ-влакын чоныштым куандара. Чапле марий вургеман акай-кокай-влак моткоч весела кумылан улыт, нунылан вес районыш да яллашке концерт дене лекташ моткоч келша. Адакшым чыла вере ончаш толшо-шамычын порын вашлиймышт, мурен-куштымыштлан совым рӱж кырымышт у пашалан кумылым пуат.
«Кас ӱжара» ансамбльыште 12 участник уло. Олор клубын худрукшо Людмила Ивановна Очеева тыге каласкалыш: «Чыланат марий шӱлышан улына, ансамбльыш кумылын коштына. Концерт дене шуко ялыш лектынна. Районышто эртыше чыла гаяк кугу мероприятийыште усталыкнам ончыктена, мемнан пагален ӱжыт. Коллектив 1991 ийыште шочын да тачат шке куатшым арален толеш. Ӱдырамаш-влак чиемым ямдылаш уста улыт, ончылсакыштак – шым тӱрлӧ тӱсан. Репетицийыш кастене погынена, репертуарыштына 25 номер уло, мурен-куштымашым эре вашталтена».
Клубышто кружок-влак пашам ыштат, йоча-влакым мураш, кушташ туныктат. Нине ӱдырамаш-влаклан кеч эрдене, кеч кастене «Репетицийым ыштена» манышт, лу минутышто погынен шуктат. Кажныжын сурт-оралтыже, вольыкшо улыт, сомылат ятыр, вуйым огыт шупш, тыманмеш толын шогалыт. Эн кугу участник – 67 ияш Зоя Егоровна Степанова. Пырля икте-весе дене лийме, мутланыме годым нимогай шӱлыкым ок шиж.
Нина Григорьевна Васильева – Олор ялыште ветеран-влакын председательышт, пеш чолга ӱдырамаш. Тудо тыге мане: «Ансамбльна илаш вийым пуа, шоҥгылыкым ок шижтаре. Мемнан мурен-куштымынам Марий телевиденийыш ик гана войзат гын, моткоч куанена ыле. Вет Параньга районышто меат ик эн ойыртемалтше ансамбль улына. Мыланна нимогай микрофон да аппаратур огыт кӱл. Аккордеон шоктымо почеш гына мурена. А семӱзгарым Маргарита Евдокимовна Очеева туге сайын шокта, тудын весела кумылжак мом шога! Йӱкым келыштарен мураш, а кычкырен, чаргыжын огыл, манын туныкта. Аккордеоным шоктымыж годым йолжо дене дирижёр гай пашам ышта, ме йолышкыжо ончалын, кушто, мо, кузе кӱлмым вигак умылена».
Олор клубын вуйлатышыже Надежда Ивановна Бирюкова клубт волгыдо, ару, еҥ-влакын чонышт куандарыше лийже манын тырша. Ачалыме, уэмдыме, кӧргыжым, чиялтыме каныме пӧртыштӧ мероприятий-влак эре эртаралтыт. Йошкар-Ола гыч артист-влак тышке концерт дене толаш йӧратат. Ял калык клубыш эре рӱж погына. Надежда Бирюкова ден Людмила Очеева ака ден шӱжар улыт. Нуно коктынат ялысе калыкын илышыже весела, пайдале лийже манын тыршат. Теве шукерте огыл Олор школышто Марий Элын калык артисткыже Елизавета Коновалован усталык касшым да «Исповедь певицы» книган презентацийжым эртарымаште «Кас ӱжара» ансамбль уна-влакым мурпӧлек дене вашлийын, касым сӧрастарен.