Самоизоляций жапыште творческий шӱлышан еҥ-влак паша деч посна шинчен огыт керт: тӱрлӧ флешмобым, конкурсым шонен луктыт, эртарат.
Марий Элын шочшыжо, кумдан палыме композитор, калык артист Андрей Яковлевич Эшпайын шочмыжлан 95 ий темме лӱмгече вашеш лӱмлӧ музыкант-влак Йошкар-Олан гимнжым марла да рушла у семын йоҥгалтареныт.
У шонымашым илышыш шыҥдараш лӱмлӧ музыкант Сергей Федонин темлен.
Землякна лӱмеш тӱрлӧ кундем гыч (Моско, Озаҥ, Нижний Новгород, Йошкар-Ола) 30 музыканче-влак ушнен, Йошкар-Олаште илыше-влакын эн йӧратыме мурыштым муреныт.
Симфонический мурым шуко возышо композитор Андрей Эшпайын ятыр мурыжо калыкын йӧратыме мурыш савырнен. Мутлан, «А снег идёт», «Ах, Одесса моя», «Москвичи», «Песня о Родине» да шуко молат. Ятыр фильмлан семым келыштарен: «Карьера Димы Горина», «Приходите завтра…», «Майор «Вихрь»», «Адъютант его превосходительства», «Кремлёвские куранты», «Трактир на Пятницкой», «Емельян Пугачёв», «Униженные и оскорблённые», «Умирать легко», «Иван Грозный», «Куприн» да тулеч моло.