Йошкар-Оласе Рӱдӧ каныме паркыште улшо «Воинский чап мемориал ансамбльым» 1960-шо ийла мучашыште ышташ тӱҥалме. Ондак тушто ял лийын, вараже тудо Колхозная уремыш савырнен. Мемориал ансамбльым ышташ проектым Йошкар-Олан тӱҥ художникше Николай Ведерников ямдылен. Ансамбльыш «Воинский чап монумент», «Курымашлык тул», «Чап аллей» комплекс-влак пурат.
«Воинский чап» монументым 1975 ийыште самырык скульптор Анатолий Ширнинын проектше почеш ыштыме. Тунам элна Сеҥымашлан 30 ий теммым палемдаш ямдылалтын. Памятникым гранит, бетон да таптыме вӱргене дене ыштыме. 20 метр кӱкшытан пилонышто куд метран сарзе-сеҥыше шога. Тудын ончыко тура ончымыжо, автоматым кӱш нӧлталмыже, тистым ушештарыше плащ-палаткыже героический образым почын ончыктат.
Курымашлык тулым 1975 ий 9 майыште чӱктымӧ. Ленинград оласе Пискаревский мемориал шӱгарлаште верланыше курымашлык тул деч пижыктыме факелым бронетранспортёр дене Совет Ушем герой А.И.Владимиров ден сарын ветеранже Н.М.Васильев конденыт. Тулым КПСС Марий обкомын икымше секретарьже В.П.Николаев чӱктен.
Курымашлык тул деке «Чап аллей» конда. Аллей мучко кок могырым Совет Ушем герой-влаклан мемориал плита-влакым вераҥдыме. Воктенышт канде кожым шындыме.
1975 ийыште Сеҥымашлан 30 ий темме лӱмеш Монументальный памятник-влак Всесоюзный выставке эртен. Совет калыкын подвигшым ончыктышо, Шочмо Элна верч кугешнымаш кумылым шочыктышо Воинский Чап мемориальный ансамбльым ик эн сайлан шотлымо да авторжо-влакым ВДНХ СССР медаль-влак дене наградитлыме. Анатолий Ширнин шӧртньӧ, Николай Ведерников ший, чоҥышо-шамыч той медаль-влак дене палемдалтыныт.