10 августышто Йошкар-Олан кечынже кумдан палыме бизнесмен, промышленник, миллиардер да мер пашаеҥ Игорь Рыбаков рӱдолашкына кокымшо гана толын кошто. Туддене палыме лияш, эсогыл йыгыре шогалын фотокартычкым ышташ, икмыняр йодышлан вашмутым колаш мыланемат йӧн лекте.
Куржын, лекцийым лудын
Эрдене эрак кумылан-влак шке вийыштым Йошкар-Оласе XXXVII марафонышто тергеныт. Тылеч ончыч амалкалче олан кечыж дене, а спортсмен-влакым марафон дене саламлен да стартыш лекташ шонен толдымо еҥ-влакымат куржаш ӱжын. Икымше дистанцийыш – 800 метрыш – куржаш миллиардер И.Рыбаков моло дене пырля лекте да уда огыл результатым ончыктыш. Тидым кажне кечын тренировкым эртарыме дене умылтарен.
Игорь Рыбаков Йошкар-Олашке кодшо ийын толын коштын. Варажым ныл кече лиймыж нерген «Секретный миллионер» передачыште ончыктеныт ыле. Окса деч посна тыште илен лекме нерген шонен. Эсогыл Чебоксар гыч Йошкар-Олашке Чарла кремль шумеш ик таксист тудым яра конден. Тушто мӱйым ужалыше Елена дене палыме лийын. «Йорло еҥым» малаш пуртымыжлан варажым тудлан пачерым пӧлеклен. Тыгаяк поро пашам ыштыше Екатериналанат миллион теҥге оксам пуэн. Тунам бизнесмен деч Йошкар-Олаште илыше-влаклан 10 миллион теҥге «кава гыч камвозын ыле».
Пайрем кечын марафон деч вара миллиардерлан ме, журналист-влак, икмыняр йодышым пуышна. Тудо мыланна уло кумылын вашештен. «Марий калыкын кочкышыжым тамлен онченда мо?» – йодым туддеч. «Уке, а могайым, мутлан?» – йодеш вашеш. «Команмелнам», – манам. «Уке, иктат темлен огыл. Тый икымше улат», – вашештыш тудо. Варажым уна 12 гыч 13 шагат марте Волгатехыште лекцийым лудын. А кастене тудо угыч рӱдоласе калыкым саламлен.
Тӱҥжӧ – эн пеҥгыде еш
Рӱдолаштына «Эн пеҥгыде еш» конкурс эртаралтын. Тудын спонсоржо лач Игорь Рыбаков лийын. Тудо шке ешыж нерген тыгерак каласыш: «Мый сеҥымашемын тӱҥ секретше нерген ойлынем! Мый мотор Екатеринам марлан налынам. Ешыштына ныл икшыве кушкеш. Ӱшандарен каласен кертам: лач пеҥгыде ешлан кӧра кугу сеҥымашыш шуынам!»
Конкурсышто 1000 утла пост лийын. Сеҥыше радамыш 11 еш лектын. Кажне участникын – шке илыш историйже. Тидын нерген Инстаграмыште нуно оҥайын каласкаленыт. Игорь Рыбаков 10 августышто кастене Патриарший площадьысе сценыште сеҥышыш лекше Ефимовмыт ешлан 200 тӱжем теҥгеаш да конкурсышто участвоватлыше 10 ешлан 10 тӱжем теҥгеаш сертификат-влакым кучыктыш. Вара кажне еш туддене войзалтын. Ты радамыште Черняевмыт, Клочковмыт, Эштыковмыт, Казаков-Мартынцевмыт, Калининмыт, Смирновмыт, Столяровмыт (снимкыште), Антонов-Речкинмыт, Ивановмыт, Лиана Орлова йочаж-влак дене лийыныт.
Сценыш лекмеке, Игорь Рыбаков вес акций нерген каласыш: «Йоча-влак, Инстаграмыште еш фотодам вераҥдыза, ача-авадан шонымашыштым возыза. Чыла тидым #спасибозалюбовь ден #мечтыродителей хэштег дене савыктыза».
Шонымаш-влакым шукташ элысе партнёр ден бизнесмен-влак полшат. Тидыже И.Рыбаковын темлымыж почеш ышталтеш. Тудлан проектым илышыш шыҥдараш кумдан палыме артист ден медиа-персоно-влак полшат. Ютубышто кызыт тидым миллион утла еҥ ончен (https://youtu.be/maT5y-gsnOc).
Лу шочшан Ефимовмыт
Сеҥышыш лекше лу шочшан Ефимовмыт еш нерген озаватын ӱдыржӧ Екатерина Елкина (Ефимова) возен. Тудо кызыт Медведево районысо Нурма администрацийыште ведущий специалистлан пашам ышта. Кок ӱдырым кушта, ешыже Йошкар-Олаште ила.
Ефимовмыт еш Медведево район Нурма селаште ила. Ава, Муканай ялын ӱдыржӧ Александра Михайловна, 19 июльышто 64 ийым темен. Шочмо кечыж лӱмеш Екатерина Интернетыште аваж нерген возен. Ача, Унчо ялын эргыже Леонид Иванович, 1995 ийыште трагически колен. Тылеч вара 10 йочам ончен куштымо паша аван вачӱмбакше возын. Тунам эн изи йочажлан улыжат ныл тылзе лийын. А тений саде эн изи шочшо – Евгений – июньышто шке еш пыжашыжым поген. Тылеч посна ты кугу ешыште тений эше ик сӱан лийын – Иван январьыште ӱдырым налын. Ынде чыланат ешан улыт.
Ешысе эн кугу икшывылан – Владимирлан – 44 ий. Тудо «Чистый город» ООО-што водительлан пашам ышта. Сергей, Николай, Андрей, Иван водитель ден тракторист улыт. Дмитрий ден Евгений кӱртньӧ омсам ыштымаште тыршат, Александр – каменщик. Алексей деч молыжо чылан шочмо кундемыште илат, тудыжо Вологда олаште контракт почеш служитла.
Ефимовмыт еш чынжымак келшен ила. Нурма селасе пӧрт эре гаяк куан йӱк-йӱан дене темеш. Александра Михайловнан кызыт 22 уныкаже да талукаш кугезе уныкаже улыт. Суртоза илышыштыже тӱрлӧ пашам шуктен, верысе озанлыкыште ушкалым лӱштен, урген, почтальонкылан, йочасадыште ороллан пашам ыштен. А кызыт сурт-оралтыштыже паша тичак. Вӱташте ушкал, сӧсна, презе, ӱшкыж да сурткайык улыт. Пакча кугу.
Лу йоча кокла гыч ик ӱдыр – Екатерина. Шочмыж годсек тудо кугу ешлан куаным конден шога. А 200 тӱжем теҥге дене эше мом ышташ, огыт пале, шочшыжо-влак аваштын ойым вучат.