Сочиште кызытсе журналист-влакын «Вся Россия-2022» XXVI форумышт таче торжественно петыралтын.
Тӱрлӧ погынымаш, семинар, икте-весе дене мутланымаш, палыме лиймаш да шке паша дене палдарымаш, ончыкылык нерген каҥашымаш, спикер, эксперт-влакын каҥаш ойышт, пашаште лектын шогышо йодышым лончылен, чын корным кычалмаш – чылажат-чылажат тӱжем дене журналист-влакын ушыштышт кужу жаплан шарналт кодыт, ӱшаным пуат, пашаште вийым ешарат. А тӱҥжӧ тыгай форум журналист-влаклан тунемаш эртаралтеш: газетнам утларак сайракым ышташ, телерадиопередачым виянракым, ойыртемалтшым ямдылаш кумылышт, йӧнышт, моштымашышт ешаралтше манын шонен. Курорт олаште каныме программе деч поснат ок лий. Репортажым возымо деч вара, семинар ден семинар коклаште изиш теҥыз воктене лияшат йӧн пуалтын.
– Тыгай форум тӱнябалне нигуштат ок эртаралт, — ойла Россий журналист ушем вуйлатыше Владимир Соловьев. Тидлан куанаш да таушташ гына кодеш.
Эдуард Иманаев.
