«Сэт» позывноян Антон Серов специальный военный операцийыш доброволец семын кок ий ончыч каен. Шукерте огыл тудо отпускыш толын ыле. Салтак дене вашлиймеке, эн ончыч ойыртемалтше позывнойжо нерген йодде шым чыте.
– Тиде мут школ гычак келшен. Историй урокым чот йӧратенам. Акрет годсо Египетыште Сет – хаос да ошман тӱтан юмо. Позывнойым ойыраш кӱлынат, ушышкем вигак тиде мут толын, – лие вашмут.
Ростов-на-Дону, Магадан, Волжск
Антон Ростов-на-Дону олаште шочын, Магаданыште кушкын. 7-ше классыште тунеммыж годым ешыж дене Волжск олаш илаш кусненыт – ача-аваже Йӱдвелыште артельыште чоҥымо пашаште тыршеныт, да нунылан Волжск олаште пачерым пуэныт. Рвезе ты оласе школ деч вара Татарстан Республик Юдино посёлкысо кӱртньыгорно транспорт училищыш поварлан тунемаш пурен. Армий деч ончыч Йошкар-Олаште ДОСААФ-ыште промышленный альпинизм курсым эртен.
Призыв почеш службыжо мучашлалтынат, контрактым подписатлен да эше кум ийлан Йӱдвел Уралыш служитлаш кодын. Тудо жаплан ача-аваже, Волжскышто пӧртым ужален, Краснодар олаш илаш кусненыт. Армий деч вара Антон тушто илен.
Но пӱрымаш тудым уэш Марий Элыш конден. 2017 ийыште, йолташыже-влак дене вашлияш шонен, икмыняр кечылан Волжскыш толын. Тунам Йошкар-Олаште ик палымыже полшаш йодын: предприятийлан кугу заказым шукташ кӱлын, пашаеҥ ситен огыл. Да але марте А.Серов Марий Элын рӱдолаштыже лакемалтын, ӱдырым налын, пачеран лийын.
– Пелашем Уфа гыч, Вероника дене соцкыл гоч палыме лийынна. Вара туддеке кок кечылан миен толынам, а эше кок тылзе гыч Йошкар-Олаш конденам. Пелашем дене икгай улына: мо мыланем келша, саде тудынат чонжылан лишыл, – манеш А.Серов.
Возалтмеке, вигак – поездыш
Антон ден Вероника 2023 ий июньышто возалтыныт. Загс гыч лекмеке, пӧръеҥ поездыш шинчын да СВО-ш кудалын. Моланжым Антон тыге умылтара:
– Коча-ковам Кугу Отечественный сар годым Киевыште иленыт, пашам ыштеныт, чылан пырля келшен илыме верч тыршеныт. А кызыт тушто свастикан еҥ-влак куржталыт. Ончыч ик ийлан контрактым подписатленам ыле, пел ий ончыч офицер званийым пуэныт, да контрактем эше кум ийлан шуенам.
СВО-што лийме кок ий жапыште пел ийжым пӧръеҥ госпитальыште эмлалтын. «Дроным кученна. Йолташем кидешемак колен», – шарналта салтак. Ты шучко кечын Волжск гыч йолташыж дене иквереш лийыныт улмаш. Операций годым Антонын кидше гыч осколкым луктын огытыл. Кызытат, сусыр верым тӱкалаш гын, пӧръеҥ нимом ок шиж, ты верым пуйто анестезий дене кылмыктыме, манеш.
СВО-што лийме жапыште Антон тӱрлӧ подразделенийыште служитлен шуктен: мотострелковыйыштат, ныл тылзе штурмовой отрядыште, кызыт – связь батальонышто.
Шеҥгек чакныман огыл
Тушто чылажат сита манын палемда салтак. Нунылан «Сердце матери» организаций эре полша. Антонын пырля служитлыме йолташыже-влак ты организацийыш чӱчкыдын полышым йодын лектыт. Раций, маскироватлалтме сетке эре кӱлыт. Кугурак да шергакан иктаж арвер кӱлмӧ годым «За Марий Эл» фонд дене кылым ыштат.
– Тӱрлыжат лиеда. Теве шукерте огыл айдеме дене кутыренат, а икмыняр жап гыч тудо уке. Южгунам чонлан тунар йӧсӧ, шинчын шортмо шуэш. Чылан ноеныт, но шеҥгек чакнаш ок лий, пел корныш чарнен шогалман огыл, – ойла пӧръеҥ.
Кок ий жаплан А.Серовын тиде – кокымшо отпускшо. Кок ганажат пелашыжлан, ача-аважлан шижтарыде толын. Сюрпризым ышташ йӧратем манын палемдыш тудо. Икымше отпускшо годымат пелашыжын паша верышкыже миен, а тиде У ий деч вич кече ончыч лийын – тыгай вучыдымо пӧлеклан кӧ ок куане! Кӱчык отпуск годым чыла ыштен шуктыман. Антон колым кучаш йӧрата, йолташыж дене Юл эҥер дек кудалыт. Москош шӱжарже, ача-аваж дек миен толман. Волжскышто туныктышыжо, пырля тунемше-шамыч дене вашлийыт, пырля погынен, мутланен шинчат.
А.Серов – лӱддымӧ, чын пӧръеҥ. Оҥыштыжо чолгыжшо наградыже-влакат тидым пеҥгыдемдат.
Авторын фотожо.