2023 ий 15 ноябрьыште «Zа Марий Эл» порылыкым ончыктымо фондым ыштыме. Фондлан ик ий теммылан пӧлеклалтше мероприятийыште шуктымо пашам иктешленыт, ончыкылыклан планым рашемденыт. Тушто Марий Элым Вуйлатыше Ю.Зайцеват лийын.
Ик ий жапыште фонд 17 гуманитарный да военно-шефский миссийым шуктен. Тыгодым фондын командыже кум ий наре жапыште СВО кайыме верыш кудалыштын да 5 тӱжем наре тонн гуманитарный полышым намиен шуктен. Пытартыш ийын гына 250 разгрузко лийын, 760 тонн полышым колтымо.
Ю.Зайцев «Zа Марий Эл» фондын гуманитарный конвой дене миен коштмо дене палдарыше фотоончерыште лийын, маскироватлалтме сеткым пидме да салтак-шамычлан аралтыш-модышым ыштыме мастер-класс-влакым ончалын. Тачысе кечын фонд салтак да утарыме регионлаште тыглай калыклан гуманитарный да военно-шефский полышым пуымым иктыш ушышо рӱдерлан шотлалтеш манын ойлен вуйлатыше. Ю.Зайцев организацийым вуйлатыше Р.Золотухинын тыршымыжымат палемден. Роман Владимирович салтак-влаклан полышым пуымашке икымше кече гычак ушнен да пытартыш кок ийыште СВО кайыме верыште 240 наре кече лийын.
– Республикыште 50 наре тӱрлӧ соцполыш пуалтеш. Геройна-влаклан полшымаште «Zа Марий Эл» фондын надырже моткоч кугу. Ты сомылыш чылан ушнат: бизнесъеҥ, профсоюзный да мер организаций-влак, федеральный структур-шамыч да тыглай калык, – ойлен Ю.Зайцев.
Мероприятий годым Марий Элым Вуйлатышын таумутшым «Песни о войне» проектын вуйлатышыже да «Zа Марий Эл» фондын волонтёржо М.Вишневскаялан, «Искож» заводлан, Йошкар-Оласе 1-ше №-ан ТЭЦ-лан да Марий целлюлоз-кагаз комбинатлан пуымо.
«Zа Марий Эл» фондын архивше гыч налме фото.