Ыштышаш пашам каҥашыме

 

Марий Эл Правительствыште 3 июньышто эртаралтше заседанийыште 2021-2024 ийлаште ыштышаш паша-влакым да корнысо правилым пудыртымо, фотовидеофиксацийым вераҥдыме йодышлам да коронавирус темым каҥашыме.

Пӱсӧ йодышлан

Марий Эл Республикысе транспорт да корно озанлык министр А.Герсименкон мутшо почеш, «Безопасные и качественные автомобильные дороги» нацпроектын тӱҥ шонымашыже – 2017 ий дене таҥастарымаште корнышто колымашым 3,5 гана шагалемдаш. Тений 10 станционарный да ик мобильно-передвижной видеофиксаций комплекс-влаклан госконтрактым ыштыме. Кызыт нуным вераҥдат.

Марий Элым вуйлатыше А.Евстифеев республикысе минтранспортлан да «Марийскавтодорлан» Волжск ден Звенигово олаласе администраций дене пырля ДТП лийме верлаште фотовидеофиксаций комплекс-влакым шындыме шотышто проектым ышташ кӱштен. Тыгак нормативлан келшен толдымо 13 «Арена» передвижной комплексым вашталтыман манын.

«Индивидуальный аралыме средства-влакым утилизироватлыме пашам терген шогаш темлем, – манын А.Евстифеев. – Огына терге гын, инфекций шуко еҥлан пижын кертеш. Тидым ышташ огеш лий. Республикыштына тиде проблеме ынже лий манын, ты паша кузе шукталтме нерген Минздрав мониторингым эртарышаш».

ГЛЕЗДЕНЁВ ЛӱМЕШ

Йыван Кырлав уремысе изи садым сылнештарыме йодышым ончен лекме.

Марий Эл Правительстве председательын икымше алмаштышыже М.Васютин Марий Эллан 100 ий теммылан пӧлеклалтше мероприятий-влакын, поснак Марий калыкын XI погынжын, октябрьыш кусаралтмыж нерген ойлен. «Погыным ямдылыме да тудым эртарыме шотышто оргкомитет мероприятий-влакын планыштым пеҥгыдемден. Тушко организационно-технический мероприятий дене пырля политически да исторически кӱлешан мероприятий-влакат улыт. Нунын кокла гыч иктыже – Йошкар-Олаште ик изи садлан марий литературым негызлыше Павел Петрович Глезденёвын лӱмжым пуымаш. Тыгак ты еҥым Марий Элыште марий газетым шочыктышо семын палат», – каласен  М.Васютин.

Тыгак республикын юбилейже вашеш моло проект почеш шукталтше паша нергенат каҥашыме. Нунын кокла гыч иктыже – Марий Эл Республикым ыштымылан 100 ий теммыжлан монументым ыштымаш. Тидын шотышто Йошкар-Ола администрацийлан республикысе Минстрой, исполнительный кучемын органже да мер ушем-влак дене пырля тений Йыван Кырла уремысе изи садлан проектым ышташ ойлен. А вара тудым 2021 ийыште «Формирование комфортной городской среды» проект почеш ышташ да садлан П.П.Глезденёвын лӱмжым пуаш, тушто республикылан 100 ий теммыжлан монументым шогалташ темлыме.

 

Э.Терентьева