Лишыл йолташ ӱдыремын илыш дене чеверласымыжлан вашке ик ият пеле шуэш. Туге чучеш, пуйто тудо кызытат ты тӱняштак. Теве йыҥгыртем да чонлан лишыл йӱкшым колам. Але отпускыш мийымеке, обязательно тудын деке лектын кудалам… Но уке, огеш лий. Шучко чер самырык ӱдырамашым, кок йочан авам, ты мотор тӱня гыч чаманыде наҥгайыш. Но тиддеч ончыч сайынак орландарыш. Ныл тылзе утла тудо кочкынат, вӱдымат подыл кертын огыл. А кузе тыге илаш лиеш? Шоналтем да йӧсын чучын колта. Лишыл еҥын тыге орланыме годым чонлан моткоч неле. Полшашат тыршыме, вес олашкат эмлалташ миен тольо. Мый эсогыл Йӱштӧ коча дечат У ий вашеш йолташ ӱдырем тӧрланыже ыле манын йодым. Но…
Ме туддене изинекак пырля кушкынна. Ик ялыште, ик уремыште иленна. Пӧртна-влакат ваштареш улыт. Ик классыште тунемынна, ик парт коклаште шинченна. Клубыш пырля коштынна, кечывалымат вашлияшак тыршенна. Шарнем, йӱр эртен кая да, ӱштервоштырым сакалтен, мый шке сурт воктенысе уремым ӱштам ыле, тудо – шке воктенже. Тӱрлӧ вере тунемаш кайымеке веле корнына ойырлыш. А вара тудо шочмо верешак еш пыжашым чумырыш, мый вес республикыште илаш тӱҥальым. Ме икте-весе дене телефон дене веле кутыренна да идалыклан ик гана, шочмо верыш мийымем годым, вашла ужынна. Но садак ме эн чот лишыл йолташ лийынна. Тудын илыме олашке мый кажне гана мияш тыршенам. Да лач тудын деке. Кызыт ынде ты олажат лишылла ок чуч, вет тушто йолташем тетла уке.
Ме йолташ ӱдырем дене ты тӱня гыч кайымыж деч кок ий ончыч ужынна ыле (вес ийжылан мийыме годым эмлымверыште улмыжлан кӧра ме вашлийын кертын огынал). Тунам нуно пелашыж дене коктын мемнам ужаташ тольыч да постельный бельем пӧлеклышт. Кызытат тиде пӧлекшым аралем. Кучылт пытарем гын, йолташ ӱдырем нерген шарнымаш ок код шонем. Тыгак полкышто шинчалан коймо верыште тудын пӧлеклыме суксыжо шога. Чӱчкыдын ты модышым кидышкем налам да йолташемым шарналтем. А шочмо ялыш толмеке, нунын пустаҥше сурт ончыкышт миен, капка ончылнышт шогышо теҥгылыш шинчам да ончылнем пырля лийме пагыт-влак сӱретлалтыт. А телефонем гыч тудын дене пытартыш кечылаштыже возкалыме смс-влакым нигунам ом кораҥде, очыни. ..
Ирина.
Йошкар-Ола.
Тынар ий эртымеке
Поро кече, «Ӱшанем… Вучем…» лаштык. Илышыште йӧратымаш дене кылдалтше шуко оҥай случайыш логалаш перна. Мый денемат икмыняр ий ончыч тыгак лие.
Мый шукертак Москваште илем да пашам ыштем. Шочын-кушкынам да школым тунем пытаренам марий ялыште. Кандашымше классыште улмем годым мемнан классыш пошкудо ял гыч рвезе тунемаш тольо: нуно ешышт дене вес район гыч тышке, коваж деке, илаш кусненыт. Миша дене икте-весылан вигак келшен шична. Тудо мылам поро чонан да эре полшаш ямде улмыжлан келшен. Ме пырля ече дене коштынна, дискотекыште куштенна. Но ик ганат ӧндалалтын да шупшалалтын огынал. Садлан мый умылен омыл: йӧрата мо тудо мыйым, келшем мо тудлан? Рвезе шкежат тидын нерген ойлаш ӧрмалген.
10 классым тунем пытарымеке, мый Москвашке акам деке илаш да тунемаш кайышым. Мишалан тидын нерген эсогыл шымат ойло. Кеч чонем дене тудым йӧратенам, но шке шижмашем нерген ойлаш ӧрынам.. Авам тунам Миша дене чон почын кутыраш темлен, но мый тудын ойжо дене келшен омыл: ондак рвезе шке чонжым почшаш, шоненам.
Москошто парикмахерлан тунем лектым да ик салонышто пашам ышташ тӱҥальым. Тыштак рвезе дене палыме лийым да марлан кайышым. Миша нерген монденамат ыле. Но…. Ик гана метрошто электричкым вучен шогымем годым тораште огыл ошкыл кайыше самырык пӧръеҥым ужым. Ом пале молан, но почешыже кайышым, пуйто мыйым ала-могай вий шӱка. Неужели тиде Миша? Лишкырак миен ончальым гын, чынжымак тудо!!! Чонем вургыжаш тӱҥале. Уэш рвезе жапыш пӧртыльым….
Ме Миша дене ынде пел ий вашлийына. Тудат Москоштак ешыж дене ила. Мыйынат ешем уло. Йоча жапысе йӧратымаш кызыт кугу тулотыш савырнен…Но ме пырля ынде лийына мо? Ала вараш кодынна?..
Ольга. Моско ола.
Поян удажак огыл
Мыйын историем тендам илышым вес семын ончалаш туныкта, шонем. Илышыште чылажат лач йӧратымаш деч шога, а поян але нужна улат – тӱҥ огыл.
Мый ялысе проста еш гыч лектынам: авам фермыште дояркылан ыштен, ачам ӱмыр мучко механизатор лийын. Школ деч вара пошкудо посёлкыш механиклан тунемаш кайышым. Туштак Лиза лӱман ӱдыр дене палыме лийна, тудо колледжыште бухгалтерлан тунемын. Келшаш тӱҥална, икте-весым йӧратен шындышна. Икана ӱдыр мыйым шке ешыж дене палымым ышташ наҥгайыш. Миен шуым гын, ӧрын колтышым: Лиза посёлко тӱрыштӧ верланыше кугу коттеджыште ила улмаш. Тудын ача-аваже коктынат бизнесмен улыт, поян илат. «Уке, тиде ӱдыр мый денем садак илаш ок тӱҥал, тудлан механизаторын эргыже кӱлеш мо?» шонен шинчышым кас мучко. Тиддеч вара Лиза дене ойырлаш манын, тӱрлӧ амалым кычалаш тӱҥальым. Тудын ончылно лӱмынак вес ӱдыр-шамыч денат каенам, кеч паленам: ӱдырлан ойгым кондем.
Ик жап гыч ме вашлиймым чарнышна. А вара мый аварийыш логальым, ик жаплан коштын кертдыме лийым, эмлымверыште кок тылзе наре кийышым. Икана ончем: омсам почын, палатышкем Лиза пура. Мый ӧрын колтышым, тунамак моткоч йӧндымын чучын колтыш. Ӱдыр мыланем йӧратымашыж нерген ойлыш, а поянлык тӱҥ огыл мане. Вара пален нальым: тудын ача-аважат моткоч проста айдеме улыт улмаш. Ме ынде 15 ий келшен илена, кум эргына кушкеш. Мый Лизалан кызытат тыгай поро кумылан улмыжлан тауштем. Тудо шке мый декем огеш тол гын, кызыт пиалан илыш дене илем ыле мо? Теве тыгаят лиеш илышыште.
Николай.
Пошкырт кундем.